Sommaire

elinjil wa n Yakhya

esenti

Awal wa imosan ennur ed temeddurt

1 estizarat as d-ikhlak Meshina eddenet da Awal ill-ay. Awal illa ghur Meshina, amaran Awal wa imos Meshina. 2 Awal estizarat illa ghur Meshina. 3-4 Meshina ikhlak-du ser-es arat kul; wer t-illa arat dagh eddenet wa ser- es du-wer-nekhlek felas Awal enta a ihakkin temeddurt ta temosat ennur y aytedan. 5 ennur imilawlaw dagh shiyyay eges indar-asnat ad t-anghinat. 6 Osa-dd' ales iyyan igan esem Yakhya, a d-izimazal Meshina; 7 imos tegeyya fel ad ammagrad s ennur wa, ezzegzenan aytedan kul s aratan win igannu. 8 enta iman-net wer imos ennur, etewesegla ghas a d-iga imos tegeyya fel ad ammagrad s ennur wa. 9 Awal wa enta a imosan ennur wa n tidet, wa d-ikkan eddenet isimelulew aytedan kul. 10 enta a ihan eddenet, ikhlak-kat-du Meshina ser-es, eges eddenet wer tu-teqbel. 11 Osa-dd' akal-net eges wer t-eqbelan aytedan-net. 12 Mishan win t-eqbalnen kul, ezzegzanan ser-es, win di ikf-en almaqam en tishit en bararan en Meshina. 13 Wer eqqelan bararan en Meshina s emmek was garrawan aytedan bararan, kala kalar emosan-tan es tenna en Meshina. 14 Wa imosan Awal, iqqal awedan ikhsar ghur-na, ikna tela n elkhurma, imos meshis en tidet. Nesinagra eteweseghmar-net, saghmar wa igarraw Barar a n iyyanda ghur Abba-net. 15 Iggeyyat as Yakhya, ishewal s afalla ad igannu: "Wa dagh as ehe batu-net, assagha wa dawan-ganna: "A dd-asu deffer-i mishan ogar-i, felas dat-i da ill-ay"". 16 Awalla ketnana negraw albaraka wer nela eddukad s elkhurma-net ikmalan. 17 Felas Meshina ikf-anagh elqanun dagh efus en Musa, elkhurma ed tidet osa-ddu der-san ghaysa elmesikh. 18 Wer t-illa awedan inayan Meshina, mishan Barar a n iyyanda imosan Meshina, illa ghur Abba, enta a danaq-q-issosanan.

esheghel wa iga ghaysa dat aytedan kul

Tegeyya en Yakhya wa isalmaghan dagh aman

19 enta da tegeyya ta iga Yakhya y arat dagh limaman ed Kel-Lebi win d-efalnen Yerusalam assagha wa tan-du-zammazalan muzaran en Kel-elyehud y ad t-essestenan d awa imos. 20 Wer ugay s a dasan-ajjawwab. Kala kalar idkal emesli-net s afalla inn-asan: "Nak wer emosagh elmesikh." 21 ennan-as: "Ma temosa za? Ilyas a temosa?" "kala kala" inn-asan, "wer t-emosa." "ennebi wa ittemalan a temosa?" "kala kala" inn-asan, "wer t-emosa." 22 Tezzar ennan-as: "Dagh adi ma temosa? Ihor a din-nasu aytedan win dana-d-esseglanen neway-asan aljawab n awa temosa. Dagh adi emel-anagh iman-nak." 23 Inn-asan arat wa inna ennebi Isayas irew: "Nak, emesli a mosa n ales a d-isagharen dagh esuf igannu: "Zezzeluleghat tarrayt y emeli."" 24 Aytedan win ehanen etteriqat en Farisaytan entanay a du-zammazalnen es Yakhya. 25 essestanan-tu nammazalan win ennan-as: "Ma fel tesalmaghagh aytedan dagh aman, kay tenne wer temosagh elmesikh, wer temosagh ennebi wa ittemalan?" 26 Inn-asan: "Nak esalmaghagh aytedan dagh aman, mishan illa gar-ewan awedan wer tezdayam. 27 enta du-z-asin deffer-i, amaran awa di-iga dagh shigrat, arra en temerkest en ghateman-net, da wer t-eweda." 28 Aratan win kul taggan dagh amadal en Betani fel tagadamayt ta hadat tesessengeyt en Yordan dad isalmagh Yakhya aytedan.

29 As iga ezel wa hadan ogga Yakhya ghaysa izay-t-idu, tezzar inna: "enta den ajaghol en Meshina wa itakkasan ibakkadan dagh eddenet. 30 enta as ehe batu-net as dawan-ganna: "Ales iyyan ad d-asu deffer-i, mishan ogar-i felas dat-i da ill-ay. 31 Nak iman-in wer t-ezdaya mishan egle-du ad salmaghagh aytedan dagh aman, fel ad d-inefilel i Kel-elyehud." 32 Iggeyyat Yakhya tolas inna: "eswada dagh Infas wa Zeddigan imos zun tedabert as d-izzebbat dagh jennawan iwar-tu. 33 Eges wer essena harwa awa imos, mishan essanagh as imal-i Meshina, s enta di-d-isseglan y ad esalmaghagh aytedan dagh aman, as: "Ad teneyagh Infas wa Zeddigan as du-z-azzabbat ighser fel ales iyyan, ales wedi enta a z-isalmaghan aytedan dagh Infas wa Zeddigan." 34 emeredda arat wa enayaq-qu es shittawen-in; amaran eggeyye silakanagh as ales wa enta Barar en Meshina."

Inalkiman win azzarnen

35 As iga ezel wa hadan, iha Yakhya edag wa harwa da, enta ed nalkiman-net eshin. 36 Ogga ghaysa as dagma-nasan d-illam, inna: "enta den, ajaghol en Meshina." 37 eslan nalkiman win eshin a i batu ta iga da, tezzar elkaman i ghaysa. 38 Iswad-in ghaysa deffer-es ogg-en elkaman-as, inn-asan: "Mas tesaggadam?" ennan-as "Menid teghsara eshikh?" 39 Inn-asan "Agliwat-du a tu-teneyam". Itagg'awen takest zagret, eglan eddewan der-es, enayan dad illa, tezzar essendan ghur-es ezel. 40 Meddan win eshin elkamnen i ghaysa deffer tasalay ta gan y awal en Yakhya, iyyan dagh-san esem-net Andrawes, amadray en Simghon Butros. 41 Immenay Andrawes d emeqqar-net Simghon estizarat, tezzar inn-as: "Nakkanay nemminay d elmesikh." (almaghna Kristos) 42 Amaran ilway-tu es ghaysa. Iswad ghaysa dagh Simghon ghas inn-as: "Kay Simghon, rur-es en Yakhya, ad tagagh esem Kefas" (esem wa ola ed wa n Butros, almaghna-net tehunt.) 43 As affaw ira ghaysa iki n amadal en Galilaya. Immenay ed Filibbus inn-as: "elkem-i." 44 (Filibbus d Andrawes ed Butros aghrem-nasan iyyanda, esem-net Betsayda.) 45 Immenay Filibbus ed Nataneyel inn-as: "Nakkanay nemminay ed was immegrad ennebi Musa dagh ettawret, emmigradan ser-es da ketban n ennebitan, a t-imosan ghaysa wa n ag Yusef wa n eghrem en Nazaret." 46 Tezzar inn-as Nataneyel: "Immikkan aghrem wa n Nazaret a t-id-egmed arat ihossayan?" Inn-as Filibbus: "Ayaw teneya." 47 Ogga ghaysa Nataneyel izay-t-idu, inna: "enta den awedan n Israyil wa n tidet, wa wer neteggez ar tarrayt tezilalaghat." 48 Inn-as Nataneyel: "Mas di-tezdaya?" Ijjewwab-as ghaysa inn-as: "Harwa-kay-du wer ighra Filibbus, assagha wad telle daw ashek wa n tehena, da ehannayaq-qay." 49 Inn-as Nataneyel: "eshikh, kay a imosan Barar en Meshina, temosagh emenokal n Israyil." 50 Inn-as ghaysa: "Tezzegzana fel as dak-ennegh ehannayaq-qay daw ashek en tehena; ad teneyagh aratan wiyyad zawwarnen ogarnen wa." 51 Tezzar inn-as: "eggeyyegh esilakanagh-awan as deffer awa ad teneyam ijennawan ennolaman tagazzayan-tan angalosan, tazabben-du fel Barar n Awedan."

Takrest ta tegat dagh eghrem en Kana

2 ezel wa n karad temal-tu tekrest dagh eghrem en Kana dagh amadal en Galilaya, teh-et anna en ghaysa, 2 tezzar itawaghrad-du ghaysa enta da, iddew-du ed nalkiman-net es tekrest. 3 As ab-as d-iqqim wala dagh esmad, tenna anna en ghaysa y as: "Esmad ighrad." 4 Inn-as ghaysa: "Anna, tedi a kam-wer-tedgez. Alwaq-in wer d-ewed." 5 Tenna mas i mashaghalan: "Agat awa as dawan-inna kul." 6 eskaran eddi sedis tekan taggazan aman as taggin Kel-elyehud ezezdeg wa imosan alghadat-nasan. ekkulu n iyyan itaggaz-t' eddukad en tameday en liter. 7 Inn-asan ghaysa: "edneyat itekan di aman." entanay degh ednayan-tan har fayyan. 8 Inn-asan amaran: "elkewat dagh-san emeredda y emaway en saksas." egan awa dasan-inna. 9 As iram emaway en saksas aman win emmettaynen da, eqqalan esmad, as wer issen iguz wa d-iga, mishan imashaghalan win tan-d-elkawnen essânan, ighra emermush, 10 inn-as: "Imesseksas kul esmad wa izodan a garrawan, amaran deffer as filawasan egrewan wa isammakkanan. Eges kay teghbara wa izodan har emeredda!" 11 enta eddi telmeghjujat temosat alghalamat ta tazzarat immozal ghaysa. Ig-et dagh eghrem en Kana ta n Galilaya. Isannafalal ser-es tarna-net, tezzar ezzegzanan ser-es nalkiman-net. 12 Deffer awen iras aghrem en Kafarnahum, enta ed maœ, ed medrayan-net, ed nalkiman-net. Wer dagh-as egen ar arat n adan.

Assa en ghaysa Ehan en Meshina

13 As d-ihoz emud wa n Akkay imosan amud maqqaran en Kel-elyehud, iggezzay ghaysa es Yerusalam. 14 Ogaz-in ghaysa dagh afarag wa ighlayan Ehan en Meshina, imassatagan en zegran, d ayfed, ed tedebren, ed teghimiten en kel sanji. 15 ig' elekkud es ghunan istaq-qan dagh afarag wedi ketnasan, entanay d ayfed, ed zegran, infaz dagh amadal izerfan en kel sanji, isabbambay tessewen-nasan. 16 Imassatagan en tedebren entanay inn-asan: "ekkesat awa dagh adag a, ad wer tagim ehan n Abba-nin asammanay n essuk." 17 ektan-du nalkiman akatab en Dawed wa innan: "Tara-nin ehan-nak tergha dagh-i shila en tamsay." 18 essestanan-tu muzaran en Kel-elyehud ennan-as: "Meni telmeghjujat temosat alghalamat tas tefraga danaq-qat taga tesitaddat as telegh almaqam n ad tagagh emazal di?" 19 Ijjewwab-asan ghaysa inn-asan: "Dagdagat Ehan en Meshina di, a tid essebdeda dagh karad adan." 20 ennan-as: "Ehan en Meshina di ekkozat temerwen n awatay ed sedis a fel itawakras. Kay mas tu-za-tessebdeda dagh karad adan?" 21 As inna Ehan en Meshina da, enta taghessa-net as igannu. 22 As d-inkar dagh temattant ektan-du nalkiman-net tenna ta iga adi. ezzegzanan es Ketban, d awal wa iga ghaysa. 23 Aytedan aggotnen ezzigzanan es ghaysa ghur anay en telmeghjujaten shin as immozal dagh adan win iga dagh Yerusalam ghur emud wa n Akkay. 24 Mishan ya ghaysa wer tan-ifles felas izday-tan ketnasan, enta 25 wer idderar s i das-igan isalan n awedan id wer das-ighber awa ihan ewel-net.

 

ghaysa ed Nikodemos

3 Ill-ay ales iyyan igan esem Nikodemos, ihan etteriqat en Farisaytan, imos iyyan dagh muzaran en Kel-elyehud. 2 Osa-ddu ghaysa ahad iyyan inn-as: "eshikh-in, nakkanay nessan as Meshina kay d-izammazalan ser-na, a dana-tesassaghra, id wer t-illa i z-agin telmeghjujaten shin tege, ar es tedhelt-net." 3 ghaysa degh inn-as: "eggeyyegh esilakanagh-ak as: Wer t-ill' awedan ifragan anay en taghmar en Meshina ar s ad ilas tehut. 4 Issestan-tu Nikodemos inn-as: "Mas du-z-iles awedan washaran tehut? ¿i tegat da wer ifreg ad iles tewaghlay en tedist en mas." 5 Inn-as ghaysa: "eggeyyegh esilakanagh-ak as: awedan wer ifreg iguz en taghmar en Meshina ar s ad ihu s aman d Infas wa Zeddigan. 6 elesel n aggadem iyyan aggadem, amaran wa d-igmadan Infas wa Zeddigan, Infas wa Zeddigan a dagh-as innodan. 7 Dagh adi a dak-wer-iqqen eghaf as dak-ennegh: Iwar-kawan ad telesam tehut. 8 Adu iggâr sas ira, kay tesalla y emesli-net, mishan wer tessena sas d-iha wala sas idag. Samal di da a iha wa ihuwan s Infas wa Zeddigan." 9 Issestan-tu Nikodemos inn-as: "Meni tat temewit tas z-agin aratan win? 10 Ijjewwab-as ghaysa inn-as: "Temosagh emusan zewweran dagh Israyil eges wer tessenagh aratan win! 11 eggeyyegh esilakanagh-ak as: "Netamagrad s awa nessan, netagayyat da fel awa nenay, eges tugayam s-ad teqbelam tegeyya-nana. 12 Dad wer tezzegzanam s awa dawan-ganna s eddenet mas za tezzegzenam awa dawan ganna s alakhirat? 13 Wer t-illa is kala inay ijennawan, ar Agg Awedan wa tan-d-igmadan. 14 emmek was isaddakal Musa ashol en darogh es tegettawt dagh taneray, emmek di dagh as z itewesedukel Agg Awedan, 15 fel ad iqqel as i ser-es izzegzanan, ad igrew temeddurt ta teghlalat. 16 Awalla, Meshina ikna tara n eddenet har as ikfa-du Barar-net a n iyyanda fel ad iqqel as i ser-es izzegzanan wer z' ihlek, kalar ad igrew temeddurt ta teghlalat. 17 Meshina wer d-issoka Barar-net eddenet fel a tat-ihlek kalar issokas-tat-du fel a ser-es tafsu. 18 I ser-es izzegzanan wer ihlek, mishan wa ser-es wer nezzegzan ihlak felas wer izzegzan s esem en Barar en Meshina a n iyyanda. 19 enta eddi da iguz wa d-iga ehluk: ennur osad-du eddenet, mishan aytedan essofan shiyyay y ennur id taggin arak mazalan. 20 Amaran i itaggan aghshud oglaf ennur, wer t-id-z-akku felas iksud ad nefilelan arak mazalan-net ezal a mallan. 21 Mishan wa itaggan arat wa imosan tidet, itakka-du ennur, fel ad iteweney, as emazal-net issind-ay dagh lekkum i Meshina.

ghaysa ed Yakhya wa isalmaghan dagh aman

22 Deffer awen ikka ghaysa ed nalkiman-net amadal en Yahudeya. Iqqim dagh-as har iga arat n azzaman enta der-san, amaran isalmagh ghaysa aytedan dagh aman. 23 Yakhya enta da isalmagh dagh aman, dagh Aynon, dagma en Salim, felas ellan-t' aman aggotnen den. Amaran tasin-t-id' aytedan isalmaq-qan. 24 Arat wa as itaggu Yakhya harwa da wer iggez kasaw. 25 Tenkar temazaq ger nalkiman en Yakhya d iyyan dagh Kel-elyehud, dagh batu en temewiten shin as itag zazdag. 26 ekkan Yakhya ennan-as: "eshik-nana, tekittewa ales wa der teddewa fel afay en Yordan wen sen, ales wedi as dana temmegrada eddi? Tahannaya! Isalmagh aytedan dagh aman emeredda amaran kul takkin-tu!" 27 Ijjewwab-asan ghaysa: "Awedan wer z-igrew ar awa t-ikfa Meshina. 28 Kawanay iman-nawan teggeyyem-i as ennegh: "Wer emosagh elmesikh, mishan tiwazamazala-du dat-es." 29 emermush enta eddi ilan temermusht, mishan emidi n emermusht, mishan emidi n emermush inkad dagma-net, issisam-as, ikna tedewit as isla y emesli-net. Tedewit di za shin-in, amaran emeredda tenda. 30 enta a ihoran ad iteweseghmer nak emela daw-es. 31 Wa d-igmadan afalla, enta a ihhoken fel awedan kul, wa ihan eddenet i n eddenet. Wa d-igmadan ijennawan, ihhokat fel awedan kul, 32 Iggeyyat s awa inay d awa as isla mishan waliyyan iqbalan tegeyya-net. 33 Wa iqbalan tegeyya-net, isilakan awa inna Meshina. 35 Abba ira Barar-net ig-as aratan kul dagh efus. 36 Wa izzegzanan es Barar en Meshina igraw temeddurt teghlâlat, wa ugayan s a ser-es izzegzen amaran alham en Meshina iha der-es iselsa."

ghaysa ed tentut en Kel Samareya

4 1-3 eslan Farisaytan as itawannu ghaysa igarraw inalkiman ogarnen win n Yakhya isalmaq-qan dagh aman. (Arat wa imosan tidet as ghaysa iman-net wer iselmigh awedan waliyyan dagh aman, inalkiman-net a salmaghnen dagh aman.) As isla ghaysa y awa itaqqalan, igmad amadal wa n Yahudeya, iqqal Galilaya. 4 Dad t-ilzam imur n amadal en Samareya, 5 os-in dagma en ¿ikhar, imosan aghrem en Samareya ihozan tawagost ta ikfa Yaqub i rures Yusef. 6 Edag wen enta a iha egharus en Yaqub. As d-osa ghaysa edag wen ammasnazal, iddaz eshikel, iqqim fel anu. 7-8 As ekkan nalkiman-net aghrem y a dd-azzanzin teýýay, tewar-du tentut en Kel Samareya du-tezragat anu en. Inn-as ghaysa: "¿ashw-i-d'." 9 Tenn-as: "Kay temosagh iyyan dagh Kel-elyehud tegammaya dagh-i aman, nak temosat iyyat dagh Kel Samareya?" 10 Inn-as ghaysa: "ennar tessanagh arat wa ihakku Meshina, amaran tessanagh awa emosa nak wa kam itansayan aman en tassay, tansiyagh-i-tan kam, akfagh-am-tan degh emosan win sidurnen. 11 Tenn-as tentut: "eshikh-in, anu i zagren amaran kay wer telegh aga, dagh adi meni du-za-tegrewagh aman win di sidurnen di? 12 ¿igrat a tegegh emaraw-nana Yaqub a danagh-ikfan anu a, ishwa aman-net, eshwan-tan maddanes d aharay-net?" 13 Ijjewwab-as ghaysa: "I ishwan aman di, ad t-iles fad iguz, 14 mishan i ishwan aman win tu-z-akfa, immizzay ed fad, felas a dagh-as eqqelan adri ingayan s aman win tu-hakkinen temeddurt ta teghlalat." 15 Tenn-as tentut: "Akf-i dagh aman win di, fel a di-igmed fad, a du wer elesagh azarog n anu a da." 16 "Aglu" Inn-as ghaysa "Aghrad-du ales-nam teqqelagh-i-du da da." 17 Tenn-as: "Wer elegh ales." Inn-as ghaysa: "Tidet-nam as tenne wer telegh ales, 18 felas semmos as kala tan-tele, amaran wa ghur tellegh emeredda wergegh ales-nam. Tidet a di-tege." 19 Tezzar tenn-as: "ehannayagh as kay ennebi a temosa. 20 Imarwan-nana adghagh a da a fel eghbadan Meshina, mishan kawanay Kel-elyehud tennam edag wa dagh itawaghbad Meshina wedi iha Yerusalam." 21 "Tantut" inn-as ghaysa, "Zegzen-i, alwaq izay-du a dagh wer za teghabbadam Abba ger za fel edghagh wa, wala dagh Yerusalam. 22 Kawanay Kel Samareya wa teghbadam wer tu-tezdayam, nakkanay Kel-elyehud wa neghbad nezday-tu felas efsan iguz wa n Kel-elyehud a d-egan. 23 Mishan alwaq izay-du --amaran osa-ddu-- was inaghbidan win tidet ad eghbedan Abba s Infas wa Zeddigan ed tidet, felas Abba inaghbidan win t-eghbadnen es temewit ta, entanay a ira. 24 Meshina Infas wa Zeddigan a imos, amaran inaghbidan-net ihor ad t-eghbedan s Infas wa Zeddigan ed tidet." 25 Tenn-as tentut: "essanagh as elmesikh, itawann-as Kristos, a d-asu. As d-osa a danagh-isassagru aratan kul." 26 Inn-as ghaysa: "Nak a t-imosan, nak wa dam-ishewalan da." 27 Assaghat ten enta a d-eqqalan nalkiman, iqqan-asan eghaf imeshawal wa iga ed tentut. Mishan wer tan-iha i ihalan ad t-issesten, ann-as: "Ma dagh as tare?" madegh "Mafel tetimeshiwila der-es?" 28 Tezzar toya-ddu tentut tetekint-net teqqal aghrem tenna y aytedan: 29 "Ayewat ad teneyam awedan a di-imâlan arat kul was kala ad t-ege, ifrâg as enta a imosan elmesikh!" 30 Tezzar egmadan-du aghrem ekkan ghaysa. 31 As itagg' awen inalkiman gammayan dagh ghaysa ad atshu, gannan-as: "eshikh, atsh' arat iyyan." 32 Inn-asan: "Imensewan win z atsha wer tan-tezdayam." 33 Ad tenemennin nalkiman gar-essan: "engem ghas wergegh awedan a das-d-ewayan imensewan?" 24 Inn-asan ghaysa: "Imensewan-in wer tan-imos ar ad ammazala tara en wa di-d-izammazalan, eghredagh esheghel wa dagh-i iga. 35 Kawanay wer tegennim: "eqqimnat-in ekkozat telil y ad tagu gharat?" Mishan nak ennegh-awan eswedat wellen dagh tewegas ad teneyam shighaghanen eõõanat, wer erenat ar emiley. 36 Awedan wa italayan, wedi igraw erruzmatan-net, ishadaw shighaghanen shin temeddurt ta teghlalat. A di da a felas wa inabbalan ed wa italayan, ketnasan eddewen. 37 Felas tidet en temajeq ta tegannat: "Ales iyyan inabbal, iyyan italay." 38 esseglaq-qawan fel ad taleyam tawagost dagh wer teshghelam, aytedan wiyyad a dagh-as eshghalnen, mishan tegrawam tenfa dagh esheghel wa egan da." 39 Aytedan aggotnen en Kel Samareya ezzegzanan es ghaysa felas tantut a dasan-tennat: "Imal-i aratan win as kala tan-ege." 40 A di da a felas as t-id-osan egmayan dagh-as a ghur-san aqqam, tezzar iqqim ghur-san ghaysa har iga eshin adan. 41 Wiyyad aggotnen ezzegzanan ser-es fel as eslan y awal-net enta iman-net. 42 Tezzar ennan i tentut: "Nakkanay seket nekna ezegzan felas estizarat kam ghas a danagh-igan isalan, emeredda iman-nana as das-nesla, amaran nessân as tidet as enta a imosan enessefsi n eddenet.

Temezzeyt en barar n amashaghal n emenokal en Kafarnahum

43 Deffer eshin adan win di, ikka ghaysa amadal en Galilaya, 44 felas enta iman-net as inna, ennebi wer iteweseghmir dagh akal-net. 45 As din-osa Galilaya eqbalan-tu Kel Galilaya id enâyan imazalan kul win iga dagh Yerusalam ghur emud wa n Akkay felas entanay da osân-t-in. 46 Ilas-du assa en Kana ta n Galilaya, ta dagh isammattay aman ig-en esmad. Aghrem en Kafarnahum ih-ay ales imosan amashaghal n emenokal. Ales wen ila rures irinan. 47 As isla as ghaysa igmâd-du amadal en Yahudeya iha Galilaya, os-ay-du onsay-tu ad idawan, das-izzuzey rures ghur tella temattant. 48 Inn-as ghaysa: "As wergegh ad tenayam telmeghjujaten, d alghalamaten emmittaynen, wer za tezzegzenam fadda." 49 Inn-as amashaghal n emenokal: "Mesh-i, eres-anagh es Kafarnahum harwa ad wer aba barar-in." 50 Inn-as ghaysa: "Aglu, rurek izzay." Ales degh izzegzan s awal en ghaysa, igla. 51 Iha tarrayt iqqâl as immenay ed mashaghalan-net das-d-elkamnen. ennan-as: "Bara-nak izzay." 52 Issestan-tan inn-asan: "Ma imos alwaq wa dagh igraw iman-net?" ennan-as: "endazel iggi en tazzar a fall-as tewat tanaday." 53 Ales degh ikta-ddu as alwaq wen da iman-net ghur das-inna ghaysa: "Rurek izzay." Izzegzan ser-es enta d aghaywan-net kul. 54 enta da da telmeghjujat ta temosat alghalamat ta n sanatat as immozal ghaysa dagh Galilaya deffer agamad-net Yahudeya.

 

Temezzeyt n anabdon

5 Deffer adi ewad-d' emud iyyan en Kel elyehud, tezzar iggezzay ghaysa es Yerusalam. 2 Aghrem wa n Yerusalam teh-ay teghazart tehozat edag was itawannu tesehert ta n Ayfed. Teghazart ta esem-net Betesda, dagh telghabranit, amaran tella ger semmosat taliwen. 3 Taliwen shin esradan daw-esnat miranan emosnen imedderghal, ed meggudal, ed nebdan. essigadan y ad eggezan aman shin emetekwey, 4 felas ellan-tu mazayan dagh d-itazabbat angalos iyyan n emeli ad ijinejerwey aman en teghazart ten. emiran kul wa azzaran iguz-net deffer enejerway wa tega da, wedi ad izzey dagh tewerna ta tu-tegrawat, a teqqal.

5 enta edag wen ih-ay ales igan karadat temerwen n awatay d ettam irin. 6 Ogg-ay ghaysa israd, enta issan as iga tewerna terewat, tezzar issestan-tu inn-as: "Awak tere temezzeyt?" 7 Inn-as emiran wa: "eshikh, nak wer elegh awedan a di-igan dagh teghazart ta dagh amazay wa dagh tinejerweyan aman-net, amaran id egmaya d iguz-net, a di-izar ser-es awedan iyyan." 8 Inn-as ghaysa: "ebded, tedkela tesalat-nak tejewenke" 9 Amazay wen da dagh izzay ales en den, tezzar idkal tesalat-net ijawankat.

enta arat wa itaggu dagh ezel en tesanfawt en Kel-elyehud. 10 ennan muzaran en Kel-elyehud y ales wa izzayan da: "Awa ezel en tesanfawt-nana, wer dagh-as tele turagat n aggay en tesalat-nak." 11 Eges ya inn-asan ales wen: "Ales wa di-izzozayan, enta di-innan: "edkel tesalat-nak tejewenke"." 12 ennan-as: "Ma imos za ales wa dak-innan: "edkel tesalat-nak tejewenke"?" 13 Mishan ya, ales wa izzayan da, wer t'ehen salan n awa imos awedan wa, felas aytedan eknanen iget a ehanen edag wa daq-q-izzozay den, iras-tan ghaysa, ijawankat.

14 Deffer awen ogaz-t-in ghaysa dagh Ahan en Meshina inn-as: "Sesem. Kay da izzayan da emeredda. eghred d igi en bakkadan, a kay wer igrew arat ogaran wa tallabest." 15 Ijawankat ales wen tezzar imal i muzaran en Kel-elyehud as ghaysa a t-izzozayan. 16 Arat wa eway-du ser-san as eknan gezzar en ghaysa felas ezel en tesanfawt dagh ig' awen. 17 Mishan inn-asan ghaysa: "Abba-nin faw da ishghâl, dagh adi nak da eshghâla." 18 Batu ta, teway-du es muzaran en Kel-elyehud as eshotan dagh agamay en tanaghay en ghaysa, felas wergegh elqanun n ezel en tesanfawt ghas a immezray, kalar ishota-du fall-as as inn' imos Meshina abba-net. Dagh adi ishashagda iman-net ed Meshina.

Tanaya en ghaysa

19 Inn-asan ghaysa: "eggeyyegh esilakanagh-awan as Barar wer ifreg igi n arat waliyyan gar-es ed man-net. Wer iteggu ar arat was ihannay Abba-net itagg-ay. Amaran arat kul wa itaggu Abba, Barar da itagg-ay s asaway wen da. 20 Felas Abba ira Barar, amaran isakn-ay arat kul wa itaggu; ad t-assaknu aratan ogarnen win da tela n almaghna y a tan-agu, fel ad tajebam. 21 emmek wa dagh-as d-isankar Abba inemmettan itaggu dagh-san iman, emmek wa da as ihakku Barar enta da temeddurt i was tat-ira. 22 enta Abba wer ikhekkem y awedan waliyyan, inkar s esherigha kul ig-ay dagh efus en Barar 23 fel ad ezzezweran aytedan kul Barar s emmek was ezzezwaran Abba. Awedan kul wa wer nezzezwar Barar, wedi wer izzezwar Abba wa t-id-izammazalan.

24 "eggeyyegh esilakanagh-awan as awedan kul wa issesaman i batuten-in, izzegzan es wa di-d-izammazalan, wedi igraw temeddurt ta teghlalat. Wer z' awwaddab, kalar temattant a d-igmad es temeddurt. 25 eggeyyegh esilakanagh-awan as izay-du alwaq -- s enta da da neha da emeredda -- alwaq wedi, aytedan win ser-i wer nezzegzan ad aslin y emesli en Barar en Meshina, amaran win das-eslanen ekkewanan-as ad egrewan temeddurt ta teghlalat. 26 Felas emmek wa dagh as ihakku Abba temeddurt, emmek wedi dagh as ikfa Barar ferregat n a tat-ihakku enta da. 27 Amaran ikfa Barar turagat n esherigha, felas imos Agg awedan. 28 Ad wer eqqenan ghafawan-nawan y arat wa: ilkam a d-awed alwaq as inemmettan kul win ehanen izekwan, ad aslin y emesli n Agg awedan 29 eddi da du-z-egmedan izekwan-nasan. Win dagh-san eganen aratan olaghnen, a d-egmedan izekwan y a d' enkeran dagh temattant egrewan temeddurt, win eganen tekma amaran a d-egmedan izekwan y ad awwaddaban. 30 Wer t-illa arat as efragagh igi-net ger-i ed man-in. esherigha wa tagga, elkama dagh-as y awa di-igannu Meshina, amaran esherigha-nin oghâd, felas wer elkema y arat wa ere nak iman-in, kalar arat wa ira wa di-d-izammazalan enta as elkama.

¿igeyyawen en ghaysa

31 "As imos as nak ghas-in as eggeyyegh i man-in, wedi tegeyya-nin wer temos tidet. 32 Illat-tu wa di imosan tegeyya iyyat, amaran essanagh as arat wa igannu dagh talgha-nin, imos tidet. 33 Tesseglam inammazalan es Yakhya, tezzar iggeyyat-asan fel arat wa imosan tidet. 34 Nak wer edderaragh es tegeyya n awedan. Arat wa wer tu-gennagh ar fel ad tegrewam tesureft. 35 Yakhya imos zun fetela terghat tebilazlaz, amaran teqbalam ad tagim arat n assaghat en tedewit dagh ennur-net. 36 Mishan nak ele tegeyya togarat ta n Yakhya assahat: esheghelan win tagga, tan-imosan win as di-issewar Abba amaknaw-nasan, entanay a emosnen tegeyya-nin, sitaddan as Abba di-d-izammazalan. 37 Abba iman-net wa di-d-izammazalan, enta da iggiyyat-i. Wer kala ad teslam y emesli-net wala tenayam azzat-net. 38 Amaran awal-net wer iha iwallan-nawan, arat wedi isitadd-ay iba nezegzan-nawan es wa d-izammazal. 39 Tetaggam i ketban tegharay tegat s ennezer felas teghilam ser-san tegrewam temeddurt ta teghlalat. Iketban win tegharrim da, entanay iman-nasan as fall-i eggeyyen. 40 Eges wer terem a di-du-takkim y ad tegrewam temeddurt.

41 Nak wer gemmeyagh etewezezwar ghur aytedan. 42 ezdayaq-qawan: essanagh as iman-nawan wer tan-teha tara i Meshina. 43 Nak Abba-nin a di-d-isseglan mishan wer terem elqebulat-in. Amaran as kawan d-osa awedan iyyan a d-iglan gar-es ed man-net, a tu-teqbelam! 44 Teram ad tetinemeseghmiram gar-ewwan, eges wer terem saghmar wa d-ifalan Meshina di n iyyan. Dagh adi manemmek as za tezzegzenam? 45 Ad wer teghilam a kawan-essewera lahan ghur Abba-nin. ennebi Musa enta kawan z-isseweran lahan, enta wa dagh tegam attama-nawan. 46 ennar tezzigzanam es Musa, tezzegzenam ser-i nak da, felas immigrad fall-i dagh ketban-net. 47 Mishan dad imos as wer tezzegzanam es ketban-net, manemmek as za tezzegzenam awa ganna?"

 

eshetshi wa iga ghaysa i semmos gim n ales

6 Deffer adi ikka ghaysa tegadamayt ta hadat n agaraw wa n Galilaya, (itawann-as harwa da agaraw wa n Tebereyad). 2 Telkam-as tiddawat tagget, felas aytedan ehannayan alghalamaten shin as immozal emosnen emmek was izzozay imiranan. 3 Iggezzay ghaysa adghagh, tezzar iqqim den da enta ed nalkiman-net. 4 As itagg' awen da amud wa n Akkay ihoz-du.

5 Iswad ghaysa ogga aytedan eknanen iget ezayan-t-idu, inna i Filibbus: "Meni du-za-nazzanzu tagella etshan aytedan en kul?" 6 esestan wa as t-iga ghaysa da issân arat was otas igi-net. A ira ghas ad issen awa das z-annu Filibbus. 7 Inna Filibbus i ghaysa: "kud du-nezzenza tagella n ezref en sanatat temad n ezel n esheghel da wer dasan-za-tawed wala arat en tattay." 8 Inn-as enalkim-net iyyan wa igan Andrawes wa n amadray en Simghon Butros: 9 "Illa arat en barar da ilân semmosat tegelwen n esheghir d eshin kifitan, mishan ya ma za aknin y aytedan ogdânen d awa?"

10 Inna ghaysa: "Saghghamiwat aytedan kul." Tezzar eqqiman aytedan kul ehan-tan amadal en semmos gim n ales. Edag wen idnay yel. 11 Obaz-du ghaysa shigelwen shin den. As ighrad igi en godan i Meshina tezzar izun-tanat y aytedan kul win eqqimnen den. Ikf-en enta da awa eran dagh kifitan. 12 As eyyewanan aytedan inna ghaysa i nalkiman-net: "¿idewat-du awa d-eglazan, fel a dagh-as wer ikhshed wala." 13 eghradan-tan-du ekemmi tezzar ednayan maraw ezmaman d eshin dagh karammutan en semmosat tegelwen shinad n esheghir a da deffer as dagh-asnat eyyewanan aytedan.

14 As enayan aytedan win alghalamat tas immozal ghaysa da, tezzar ad gannin: "Igmad ashak as ales wa enta a imosan ennebi wa du-z-asin eddenet!" 15 Issan ghaysa as aytedan win ad t-abezan shehheshelan-tu tishit n emenokal, tezzar ilas-tan efel, ikk' edag iyyan dagh edghagh en da, ghas-net.

ejewenki wa iga ghaysa fel aman

16 As tega takest zagadayan nalkiman-net s agaraw, 17 eggazan taghlalt tezzar essewalan agaraw y ad eghresan es Kafarnahum. Ehad igâ, amaran ghaysa wer tan-in-ewed harwa da. 18 Igar-du adu issohen tezzar ad tanastaban aman n agaraw. 19 As egan nalkiman en ghaysa edag en semmos kilawtan madegh sedis n eshikel, oggan ghaysa dagh ihez ijiwankat-du fel aman izay-du taghlalt ta han, tezzar teggaz-tan tasa. 20 Mishan inn-asan: "A kawan wer teggez tasa, awa nakku!" 21 Gammayan d a t-id-ezzugezan taghlalt den da, wal' a ihogan tewad der-san edag wa ekkan.

Amensay wa ihakkin temeddurt wer t-imos ar ghaysa.

22 As ezel wa hadan tegr-in tiddawat ta tewarat efay n agaraw wa wen sen as taghlalt iyyadda ghas a tellat den endazel, amaran essanan as ghaysa wer inamaggaz taghlalt ta ed nalkiman-net. essanan enta da as inalkiman-net ghas-nasan as eglan. 23 enzaynat-du shiyyad a d-efalnen aghrem wa n Tibereyad. Osanat-du dagma n adag wa dagh tetsha tiddawat tagella deffer godan win iga ghaysa y emeli. 24 As din-tegra tiddawat as ghaysa wer illa den enta wala inalkiman-net, teggaz shighlalen shin den y ad tesesseggel ghaysa es teghremt ta n Kafarnahum.

25 egrawan-tu fel afay n agaraw wa hadan tezzar ennan-as: "emmay du-tose da, ya eshikh?" 26 Ig-asan ghaysa aljawab wa: "eggeyye silakanagh-awan as wer di-teseggedam ar fel as tetsham tagella har dagh-as teyyewanam, wergegh ashaddat n egerri n almaghna n alghalamaten shin as emmozala a fel di-telkamam. 27 Ayyat esheghel dagh agamay en mensewan win ghashadnen, gammayat imensewan win tahaginen, hakkin temeddurt ta teghlalat. Imensewan win Ag Awedan dawan-tan-z-akfin felas enta a issewar Meshina di n Abba ejwal wa n taghmar-net.

28 essestanan-tu ennan-as: "Meni za arat was ihor a tu-nagu fel ad naknu esheghelan win ira Meshina?" 29 Ijjewwab-asan ghaysa inn-asan: "esheghel wa dagh-wan ira Meshina, wer t-imos ar ad tezzegzenam es wa d-issegla." 30 elasan-tu esestan ennan-as: "Ma temos za alghalamat tas dana-za-tammazala fel a ser-ek nezzegzen? Meni awa za taga?" 31 Imarawan-nanagh etshan dagh taneray amensay wa n Manna. Arat da wa iktaban dagh batu tedi:

"Ishetsh-en amensay wa d-ifalan ijennawan."

32 Tezzar ijjewwab-asan ghaysa inn-asan: "eggeyyegh silakanagh-awan as werge Musa kawan-ikfan amensay wa d-ifalan ijennawan. Abba-nin enta kawan ihakkin amensay wa d-ifalan ijennawan, imos amensay wa n tidet. 33 "Felas amensay wa d-igmadan ijennawan, enta a d-ifalan Meshina, amaran enta a ihakkin temeddurt y eddenet." 34 ennan-as: "emeli, hakk-ana amensay wedi faw."

35 Inn-asan ghaysa: "Nak a imosan amensay wa ihakkin tameddurt ta teghlalat. Wa di-d-ikkan wer da-as ilkem ad t-iggaz gelek, amaran wa ser-i izzegzanan wer dagh-as ilkem ad t-iggaz fad. 36 Mishan emalagh-awan arat wa: tenayam-i eges wer tezzegzanam.

37 Awedan kul wa di-ikfa Abba a di-d-asu, wer ilkem ad estaghagh i di-d-ikkan; 38 felas ezebbi a d-egegh dagh ijennawan fel ad ammazala s arat wa ira wa di-d-isseglan, wergegh arat wa ere nak iman-in. 39 enta wa di-d-izammazalan wer ira ad ikhrek waliyyan dagh win di-ikfa, kalar a ira a tan-d-essenkera dagh temattant ezel a ilkaman. 40 Awalla, enta da tara n Abba-nin: Aytedan kul win di-enaynen nak wa n Barar, ezzegzanan ser-i, entanay a z-egrewnen temeddurt ta teghlalat, essenkeraq-qan-du dagh temattant, ezel a ilkaman.

41 Tezzar ad tigetentinan Kel-elyehud ehan batu-net fel as inna: "Nak a imosan amensay wa d-izzebben dagh jennawan." 42 Gannin: "Awak awen werge ghaysa wa n ag Yusef, nekna temezdeyt n abba-net d anna-net, meni emmek was du-z-inker emeredda ad igannu ijennawan dagh d-izzebbat?" 43 Ijjewwab-asan ghaysa inn-asan: "Ayyiwat egetenten gar-ewan. 44 Wer t-illa i di-du-z-akkin ar s a t-id-ilway ser-i Abba wa di-d-isseglan. Nak amaran esenker a t-idu-z-aga dagh temattant dagh ezel a ilkaman. 45 Iketban n ennebitan ih-en as: "Ketnasan a tan-isassaghru Meshina". Awedan kul wa islan awa d-ifalan Abba, tezzar irda s awa isassaghra wedi a di-d-akku. 46 Wer t-illa is kala ad inay Meshina di n Abba ar wa t-id-ifalan. Wedi inay Abba.

47 "eggeyyegh esilakanagh-awan as i izzegzanan ad igrew temeddurt ta teghlalat. 48 Nak a imosan amensay wa ihakkin temeddurt. 49 Imarawan-nawan etshan Manna dagh taneray mishan wer dasan-igdel awen temattant. 50 As ig' awen amensay was ganna nak, ijennawan a dagh d-izzebbat y as i t-itshan wer tu-z-iba. 51 Nak a imosan amensay wa d-izzebben dagh jennawan ihakku tameddurt. Awedan kul wa itshan amensay wa, wedi ad idder har faw. Amaran isan-in a mosnen imensewan win z' akfa fel ad tegrew eddenet temeddurt."

52 Ad tamastanan Kel-elyehud gar-essan gannan: "Manemmek as dana-z-akfu awedan wa isan-net natsh-en?" 53 Tezzar inn-asan ghaysa: "Awalla, eggeyyegh esilakanagh-awan âs as wer tetshem isan en Barar n Awedan, tashwin enta da azni-net, wer dawan-tu-tella temeddurt. 54 Awedan wa itshan isan-in ishwa enta da azni-nin, wedi igrâw temeddurt ta teghlalat, amaran a t-id-essenkera dagh temattant ghur ezel a ilkaman. 55 Felas isan-in emosan amensay wa n tidet, azni-nin da imos aman en tassay win tidet. 56 Awedan wa itshan isan-in, ishwa azni-nin, wedi irtay der-i, nak degh ehegh ewel-net. 57 emmek was Abba wa di-d-isseglan enta a ihakkin temeddurt, amaran enta a di-issodaran, emmek di dagh as wa itshan isan-in a ser-i idder. 58 Amensay wa ijennawan dagh d-izzebbat. Wer ola ed wa etshan marawan-nawan felas wer dasan-igdel adi tamattant. Awedan wa itshan amensay wa, wedi ad igrew temeddurt teghlâlat." 59 Arat da da wa inna ghaysa assagha wa ad isassaghra dagh ahan n elghibada en Kel-elyehud dagh eghrem wa n Kafarnahum.

Efel wa egan aytedan weyyad deffer ghaysa, elkaman-as wiyyad

60 As eslan nalkiman-net aggotnen y esesseghri wa itaggu da ennan: "Batu ta shi labasat, izzewat ezegzan-net. Ma ifragan elqebulat-net?" 61 ghaysa issan dagh man-net as inalkiman-net gitantanan gar-essan dagh talgha ten, tezzar inn-asan: "engem ezegzan-nawan a tedas batu ta?" 62 Ma za tagim za as toggam Barar n Awedan itagazzay s adag wa iha estizarat? 63 Infas wa Zeddigan a isiduran. Awedan iman-net, wer imos wala. Awalan win dawan-egegh, hakkan Infas wa Zeddigan ed temeddurt. 64 Mishan ehan-kawan wiyyad wer nezzegzan." ghaysa harwa ghur tizarat da issan win wer nezzegzan, issan enta da wa tu-z-agin dagh fassan. 65 Inn-asan tolas: "Adi da a fel dawan-enne: "Wer t-illa i ifragan a di-d-akku ar s ad t-ikfa Abba ferregat n adi."

66 Den da deffer-es ifal a eggen dagh nalkiman-net, eghradan ed tidawt-net. 67 Tezzar inna ghaysa i nalkiman win maraw d eshin: "Meqqal kawanay da teram teklay?" 68 Ijjewwab-as Simghon Butros inn-as: "emeli, ma imos wa za nakku? Kay a itaggan awalan win ehakkanen temeddurt ta teghlalat. 69 Nakkanay nezzigzan ser-ek, nessan as kay emizdag a d-ifalan Meshina." 70 Inn-asan ghaysa: "Ak wergegh esennefren a kawan-ege ketnawan, fel maraw-ewwan d eshin? As iga awen da iyyan dagh-wan imos ashayatin." 71 Batu ta Yahuza wa n ag Simghon Iskhareyuti a fel tat-iga ghaysa. Felas Yahuza tu z-agin dagh fassan da imos iyyan dagh nalkiman a n maraw d eshin.

 

elmesikh iha tarrayt es Yerusalam

7 Deffer adi issewal ghaysa d akal en Galilaya, felas wer ira esewel en wa n Yahudeya, imos as imuzaran en Kel-elyehud a gammaynen ed tanaghay-net. 2 As ig' awen ihoz-du emud en Kel-elyehud was itawannu wa n tekarbanen. 3 ennan-as medrayan-net: "efel da takka akal wa n Yahudeya fel ad eneyan nalkiman-nak esheghelan win tetagga. 4 Awedan as ira fall-as tagu masnat wer isheqqel dagh essir. Dad zama as tetaggagh aratan ogdanen d awa, wedi agu temewit ta fel tan-z-iney awedan kul." 5 enta imedrayan en ghaysa iman-nasan da wer ser-es ezzegzanan. 6 Inn-asan ghaysa: "Assaghat ta-nin harwada wer du-tewed. Kawanay amaran wer tezlayam assaghaten. 7 Wer t-illa eddelil fel kawan-za-tegzer eddenet. Nak amaran eddenet tegzar-i felas emosa tegeyya y arak mazalan win dagh-as tagginen. 8 Akkiwat amud wen kawanay. Nak wer t-ekke felas assaghat-in harwada wer du-tewed." 9 As dasan-ighrad tenna n aratan win, tezzar iqqim-du dagh Galilaya.

10 Der iga awen da ya as ekkan medrayan-net amud, ikk-ay enta da, eges iki wa zun as iga dagh essir, felas wer issekna iman-net y aytedan. 11 Itaggu emud den da sasaggalan-tu muzaran en Kel-elyehud gannan: "Ma iga ales a?" 12 As iga awen tenkâr temazaq ger aytedan dagh talgha en ghaysa. Wiyyad za gannan: "Ales di olâgh." Wiyyad amaran gannan: "Kalar esekhrek fadda a itaggu tamattay." 13 Mishan wer t-illa awedan ihalan amagrad dat aytedan dagh talgha-net, fel tekseda en muzaran en Kel-elyehud.

Assa en ghaysa Ehan en Meshina

14 As isaggaraygaray emud iggezzay ghaysa s Ahan en Meshina ad isasaghru aytedan. 15 Arat wa iqqan ighafawan en Kel-elyehud wellen har eqqiman gannin: "Meni esaway was issan awedan wa aratan win, enta wer ighra?" 16 Inn-asan ghaysa: "esesseghri-nin werge nak a d-ifal, kalar wa di-d-izammazalan a d-ifal. 17 Awedan kul wa iran ad ammazal tara en Meshina, wedi ad issen kud esesseghri wa enta a d-ifal wala degh nak t-id-iktan ger-i ed man-in. 18 Awedan wa ishewalan s esem-net enta ghas, wedi iman-net as igammay eteweseghmar. Mishan awedan wa ishghalan dagh esennefilel en tarna en wa t-id-isseglan, wedi tidet a immal, wer dagh-as t-illa a imosan lahan. 19 Musa wergegh ikf-iwan elqanun? Eges elqanun wa wer kawan-iha i das-ilkaman. Mafel as teram a di-tanghim?" 20 Tenn-as tamattay: "Kay aggesuf a kay-izdaghan. Ma imos wa iran tenaghay-nak?"

21 Inn-asan ghaysa: "Nak telmeghjujat iyyadda ghas a emmozala, mishan eqqanan-as ghafawan-nawan. 22 Musa omar-kawan s esemmenked en bararan-nawan, (as ig' awen da imarawan-nana a t-id-essentanen, werge Musa), amaran wer fall-awan imos lahan ad tesemmenkedam barar dagh ezel wa n tesanfawt-nawan. 23 eneyat za, dad imos as itawasamankad barar dagh ezel en tesanfawt fel lekkum y elqanun wa n Musa, mafel as kawan-iha alham-in feläs egegh y awedan ezuzey ikmâlan dagh ezel en tesanfawt? 24 Ayyiwat akhakam n aratan s awa tehannayam dagh azzahir. Kalar khakkamat-tan es temewit tezilalaghat."

25 As t-oggan arat dagh aytedan win Yerusalam ad gannin: "Ales wen wergegh enta as eran muzaran-nana tenaghay-net? 26 Amaran enta da emeredda ishewalan da dat awedan kul, wer t-illa i das-igannin wala! Ak immikkan imuzaran-nanagh a sallakannen as enta a imosan elmesikh? 27 Mishan ya ales wa nessan akal wa d-ifal, as ig' awen elmesikh assagha wa du-z-asu, wer t-illa awedan a z-issenan da du-z-ifel." 28 ghaysa harwa da isasaghru dagh Ahan en Meshina, idkal emesli-net wellen inna: "Tezdayam-i tessanam sas d-ehe! As ig' awen da wer d-ose ger-i ed man-in: mishan wa di-d-isseglan tidet a imos amaran wer tu-tezdayam. 29 Nak ezdayaq-qu, felas enta ser-wan d-efala, amaran enta di-d-izammazalan."

30 Tezzar egmayan d abbaz-net mishan wer tan-iha i t-idasan, felas alwaq-net a du-wer-newed harwada. 31 As ig'awen da ya izzigzan ser-es a aggen dagh tiddawat ten, gannin: "Tordam as kud d-osa elmesikh ifrag igi n alghalamaten ogarnen shin iga ales wa?"

32 Arat wa simetektikan aytedan dagh tiddawat ta, eslan-tu Farisaytan. enkaran limaman win zawwarnen, ed Farisaytan esseglan-du imagazan n Ahan en Meshina y ad abezan ghaysa. 33 Inn-asan ghaysa: "Nak harwa da eddewa der-wan har arat en tamert, deffer adi ad akka wa di-d-izammazalan. 34 A di-tesasaggalam mishan wer di-za-tegrewam felas edag wa z'akka wer tefregam iki-net." 35 Ad tinemesestinan Kel-elyehud, gannin: "Ma imos adag wa z'akku daq-qu wer za negrew? Meqqal Kel-elyehud win wazawaznen dagh kallan win tama a z-akku iggez-tan amaran ad isasaghru aytedan win wer nemos Kel-elyehud? 36 Ma imos almaghna en batu ta iga da, as inna: "A di-tesasaggalam mishan wer di-za-tegrewam, felas wer tefregam iki n adag wa ehe"?"

Aman win sidurnen

37 As d-ewad ezel wa ilkaman, s enta a imosan ezel wa zewwaran dagh emud, ibdad ghaysa dat tiddawat iqqerra s emesli idkâlan inna: "Awedan kul wa iffudan akkiwet-i-du ad ashew. 38 Awedan kul wa ser-i izzegzanan "ad engeyan gerwan n aman win sidurnen dagh ewel-net", s emmek wa imal Akatab." 39 Infas wa Zeddigan fel immegrad ghaysa den, s enta a z'egrewan aytedan win ser-es ezzegzannen. Azzaman en Infas wa Zeddigan wer itawagraw felas ghaysa harwada wer igrew adkul.

emezzey ger aytedan

40 Edes n aytedan en tiddawat ten, as eslan i batuten shin iga ghaysa da ennan: "Illikan as ales wa enta a imosan ennebi wa ittemalan!" 41 ennan weyyad: "elmesikh awa!" ennan-asan weyyad: "Manemmek as du-z-igmed elmesikh Galilaya? 42 Akatab wergegh a inna:

"ezzurreyya en Dawed, ed teghremt en Betlekhem s enta as kala dagh-as ighsar Dawed, a du-z-igmed elmesikh"."

43 emmek wen dagh as tezun tiddawat dagh talgha en ghaysa. 44 Wiyyad dagh-san eran abbaz-net, mishan wer tan-iha is t-idas efus-net.

45 Tezzar eglan magazan n Ahan en Meshina eqqalan ilimaman win zawwarnen, ed Farisaytan. Osan-in ghas ennan-asan: "Mafel wer t-idu-tewayam?" 46 ennan-asan magazan: "Wer kala itawanay awedan igan awal olan ed wa iga ales en." 47 ennan-asan Farisaytan: "Dagh adi kawanay da toyyam iman-nawan tetawasakhrakam? 48 essenat ill-ay i ser-es izzigzanan dagh-na? 49 Wer ser-es izzegzan ar tiddawat n aljahilan wer nessen wala dagh Attawrit, as ketnasan tewar-tan tulghant." 50 Issestan-tan Nikodemos imosan iyyan dagh Farisaytan s enta din-osan ghaysa dat awen, inn-asan: 51 "esherigha-nana wer t-iha ad itewekhkem awedan iket wer ishewal, itewessen awa dagh ishokal." 52 ennan-as: "Galilaya kay telat kay da? Aghru Ikataban ad teneya kay iman-nak as wer t-illa ennebi du-z-igmedan Galilaya."

53 Deffer awen iffezzat emeney, ikk'awedan kul ehan-net.

 

Tantut ta tegat ezzena

8 Ikka ghaysa Adghagh wa n Azzaytunan. 2 As affaw aghóra iqqal Ehan en Meshina tezzar tehoz-t-in tiddawat ketnet. Iqqim a tan-isasaghru. 3 Ishewal den da as d-osan musanan n ettawrit ed Farisaytan ewayan tantut a d-eghdaran tetaggu ezzena. essebdadan-tat dat awedan kul, 4 ennan i ghaysa: "Ya eshikh-nana, tantut a ezzena a tega, amaran tetiwaghayyan tetagg-ay. 5 Dagh ettawrit za a inna Musa: "tantut en zun ta, ilzam a tat-eggaran aytedan es tehun har tat-iba". Amaran kay ma tenne?"

6 Arat wa imos temerkest das-egan fel ad t-esseweran lahan. Edag an a dasan-ajjawwab ghaysa, inaz ad ikattab s adad-net fel aøadal. 7 eqqiman edgazan dagh esestan-net, as ihog ibdad-du inn-asan: "Inkeret-du dagh-wan was kala wer iga abakkad, izaret es temegirt-net." 8 Ilas enez ad ikattab s adad-net fel aøadal. 9 As eslan i batu ta, tezzar mazazaran eglan, azzaran-asan win washarnen. Iqqim-du ghaysa ghas-net enta ed tentut ta nad, tebdâd dat-es harwa da.

10 Tezzar ibdad-du inn-as: "Tantut, ma egan za? Wer tan-iha i kam-iwwiddaban?" 11 Tenn-as: "Waliyyan dagh-san, emeli-nin". Inn-as ghaysa: "Nak da za wer kam-z-awaddaba. Aglu tejewenke, mishan ad wer telesagh igi en bakkadan."

ghaysa wa imosan ennur n eddenet

12 Ilas ghaysa awal i tiddawat inna: "Nak a imosan ennur n eddenet. Dagh adi wa di-ilkaman ad igrew ennur wa isiduran amaran wer das-ilkem ad ijiwankat dagh shiyyay. 13 ennan-as Farisaytan: "Tegeyya en man-nak a temosa, arat wa tegannagh eddi irkam wellen." 14 Inn-asan ghaysa: "Kud imos as tegeyya en man-in a mosa da tegeyya-nin temos tidet felas essana sas d-ehegh, ed sas edaga. Mishan kawanay wer tessenam sas d-ehe, wala sas edaga. 15 Kawanay azzahir as tesharragham aytedan, nak amaran wer sherregha waliyyan. 16 As ig'awen da as fall-i d-osa adi, ad sharragha, amaran esherigha-nin issohat, felas iddew der-i Abba wa di-d-isseglan. 17 elqanun-nawan iktab dagh-as âs tegeyya n eshin meddan a temosat tidet. 18 Nak za tegeyya iyyadda a mosagh i man-in, tegeyya-nin ta n sanatat amaran Abba s enta di-d-isseglan a tat-imosan." 19 Tezzar ennan-as: "Menid illa Abba-nak?" Inn-asan ghaysa: "Wermad di-tezdayam za wer tezdayam Abba-nin. ennar di-tezdayam tezdeyam Abba-nin entada."

20 Batuten shin itagg-enat ghaysa assagha wa dagh isasaghru dagh Ahan en Meshina ghur adag wa dagh tiddawan errezeghan. Mishan wer t-illa i igmayan d a t-abez felas alwaq-net a du-wer-newed harwada.

Wer tefregam iki en dad ekke

21 Ilas ghaysa inn-asan: "Teklay a z-aga, amaran a di-tesesseggelam, mishan a kawan-iba dagh tishit en nasbakkadan. Wer tefregam a di-in-telkemam s adag wa ekke." 22 Ad tinemennin arat dagh Kel-elyehud gar-essan: "Meqqal iman-net a z-anghu, felas a inna wer nefreg a das-nelkem s adag wa ikka." 23 Inn-asan ghaysa: "Kawanay aytedan n ares a temosam, nak in afalla. Kawanay kel eddenet a da a temosam, nak wer di-tela eddenet a. 24 A di da fel dawan-enne a kawan-iba dagh tishit en nasbakkadan. As wer tezzegzanam as emosa "Wa Illan da", elasagh-awan emel n as a kawan-iba dagh igi en bakkadan." 25 "Ma temosagh?" ennan-as. Inn-asan ghaysa: "Awa dawan-emmala ghur tizarat har harwa a mosa." 26 ellan-tu aratan aggotnen as efragagh a tan-anna dagh talgha-nawan, ellan-awan-tu attadiban aggotnen. Mishan wa di-d-isseglan Meshis en tidet a imos, amaran arat wa di-d-inna, a emmala y eddenet."

27 Wer egren as Abba fel dasan-immegrad. 28 Tezzar inn-asan ghaysa: "As tegam iman n Ag Awedan s esehhuki wa das-za-tagim fel tegettawt, ad tessenam as nak emosa "Wa Illan da". Ad tessenam as wer t-illa a tagga ger-i ed man-in, arat wa di-isassaghra Abba ghas a ganna. 29 Wa di-d-izammazalan iddew der-i. Wer di-oyya ghas-in felas faw da arat wa das-igrazan ghas a tagga." 30 Amazay wa dagh inna ghaysa arat wa, ezzegzanan ser-es aytedan aggotnen.

Win emosnen ezzurreya n Ibrahim es tidet

31 Tezzar inna ghaysa i Kel-elyehud win ser-es ezzegzanen: "As tebberdagam y awa kawan-sassaghra, eddi temosam inalkiman-in win tidet, 32 tessenam tidet, tidet amaran enta kawan-za-tesellellet."

33 ennan-as: "Nakkanay ya ezzurreyya n ennebi Ibrahim a nemos, wer kala dagh eddenet ad neqqal eklan en waliyyan, mafel as teganna: "Ad tallallem"?" 34 Inn-asan ghaysa: "eggeyegh esilakanagh-awan as awedan kul wa itaggin ibakkadan, wedi akli en bakkadan a imos. 35 enta akli wer das-t-illa adag en faw dagh aghaywan, mishan Barar wa eraw aghaywan wedi edag-net ill-ay har faw. 36 Dagh adi as kawan-isaddarfat Barar, wedi ad tallallem es tidet. 37 essanagh as ezzurreyya n Ibrahim a temosam, mishan tegammayam d ad tagim iman-in felas awal-in wer ides iwallan-nawan. 38 Nak arat wa enaya ghur Abba-nin a emmala, amaran kawanay tetaggim awa as teslam ghur abba-nawan Iblis."

39 ennan-as: "Abba-nana ya Ibrahim a t-imosan." Inn-asan ghaysa: "ennar tidet âs temosam bararan n Ibrahim ad tetaggim imazalan win iga Ibrahim. 40 Kawanay amaran emeredda tegammayam ed tanaghay-nin, nak imosan awedan dawan-immalan tidet s emmek was di-tat-d-inna Meshina. Arat wedi wer t-iga Ibrahim. 41 Imazalan win iga abba-nawan a tetaggam." ennan-as: "Nakkanay wer nemos iniba; wer nela ar abba iyyanda a t-imosan Meshina."

42 Inn-asan ghaysa: "ennar Meshina a imosan Abba-nawan tarim-i, felas Meshina a d-egmada, enta a d-efala, werge ger-i ed man-in as d-ose, kalar enta di-d-izammazalan. 43 Mafel wer tegrem temajeq-in? Wer dawan-igdel egerri-net ar as wer tefregam esesem y awal-in. 44 Wer telem dagh abbatan ar Ashaytan, amaran teram ad tassandim deranan n abba-nawan. Harwa ghur enetti ad iqqal eljani, amaran wer ibded dagh tidet, felas wer teha tidet ewel-net. Igi en bahu a imosan ettebighat-net felas anasbahu a imos n abba en bahu. 45 Mishan nak tidet as tamagrada. Adi da fel di-wer-tezzegzanam. 46 Ma dagh-wan imos wa z-isattaddin as egegh ibakkadan? Kud tidet a emmala mafel wer di-tezzegzanam? 47 Awedan imosan arat dagh tamattay en Meshina, esesem a itaggu y awal en Meshina. Kawanay amaran wer tesesimam, felas wer temosam tamattay en Meshina."

ghaysa d Ibrahim

48 Tezzar ennan Kel-elyehud i ghaysa: "Wergegh kala nenna kay iyyan dagh Kel Samareya a temosagh amaran izdaq-qay aggesuf?" 49 Inn-asan ghaysa: "Wer di-izdegh aggesuf, Abba-nin ghas a esseghmara, kawanay amaran wer di-tesseghmaram. 50 Wer gemmeya adkul i man-in. Ill-ay wa di-igammayan adkul, amaran enta a ikhakkaman. 51 eggeyyegh esilakanagh-awan as awedan wa ittafan awal-in, wer ilkem ad inay temattant."

52 ennan-as arat dagh Kel-elyehud: "emeredda ad nekkas ashak as izdaq-qay aggesuf! Ibrahim da aba-tu enta harkid ennebitan kul, kay amaran teganna: "Awedan kul wa ittafan awal-in wer ilkem ad t-aba." 53 Abba-nanagh Ibrahim da aba-tu: tordegh as togaraq-qu almaqam? ennebitan da aba-tan. Kay ma tekhsabagh iman-nak?"

54 Inn-asan ghaysa: "As imos as iman-in fel sanamala, wedi wer elegh adkul waliyyan. Abba-nin a di-ihakkan adkul, enta as tegannim: "Imos emeli-nana", 55 amaran wer tu-tezdayam, mishan nak ezdayaq-qu. As enne wer t-ezdaya, wedi ad eqqelagh anasbahu en shilat-nawan. Kalar ezdayaq-qu, amaran ettafagh awal-net. 56 Abba-nawan Ibrahim imâl-tu ed tedewit fel as das-igmad ashak as ad iney assa-nin, amaran inay-tu, ikna tefalawist y awen." 57 ennan-as Kel-elyehud: "Kay wer teweda wala semmosat temerwen n awatay eges tenne tenayagh Ibrahim?" 58 Inn-asan: "eggeyye silakanagh-awan as dat tehut n Ibrahim da nak emosa "Wa Illan da"." 59 Tezzar ad takammen shihun y a das-agin zabaw, mishan ya ilghas-asan, igmad afarag n Ahan en Meshina.

 

ezuzey wa iga ghaysa y awedan a d-ihewan ed taddarghalt

9 Ijiwankat ghaysa as inay ales s as d-ihew da imos emedderghel. 2 essestanan-tu nalkiman-net ennan-as: "eshikh, mafel ihew-d' ales a imos emedderghel? Ak eddelil n abakkad-net, megh ak abakkad en marwan-net?" 3 Inn-asan ghaysa: "Wermad iddirghal fel eddelil n abakkad-net, wala degh abakkad en marwan-net. Wer idderghal ar y a fall-as teteweney tarna en Meshina. 4 Iwar-anagh ad naknu esheghelan en wa di-d-isseglan iket di ad ig'azal, felas ehad izay-du, amaran wer t-illa i dagh-as ifragan esheghel. 5 Iket ehegh eddenet emosagh ennur n eddenet."

6 As iga batu ta, issotaf dagh amadal, ig' arat en talaq es tesutaf-net, isselal-tat i shittawen n emedderghel, 7 inn-as: "Aglu shired udem-nak dagh teghazart ta n Silokham (esem wa almaghna-net anammazal.) Igla emedderghel ishorad udem-net, as d-iqqal da ihannay.

8 Ad gannin naragan-net, d aytedan win t-enaynen imos emansay dat awen: "Ak awa wergegh emedderghel was faw iqqim itansay?" 9 Wiyyad gannin: "enta dagh awen.", wiyyad enta da gannin: "Kala, tulat ghas der-es iga." enta amaran igannu: "Nak dagh awa." 10 A tu-sastanan gannan-as: "Meni esaway was tegrawagh asawad-nak?" 11 Inn-asan: "Ales as gannin ghaysa, a igan arat en talaq, tezzar isselal-tat i shittawen-in, inn-i ad aglagh eshiredagh udem-in dagh teghazart ta n Silokham. eglegh eshoradaq-qu ghas, egrawagh asawad-in." 12 ennan-as: "Ma iga za ales wedi?" Inn-asan: "Wer essena".

13 elwayan aytedan win ales was kala ad imos emedderghel, har der-es osan Farisaytan. 14 enta ezel en tesanfawt en Kel-elyehud a dagh iga ghaysa talaq, isseswad emedderghel wen. 15 A tu-sastanan Farisaytan entanay da d asaway was igraw asawad-net. Inn-asan ales wa: "Arat en talaq a iga fel shittawen-in, eshoradagh udem-in, amaran emeredda ehannaya." 16 Ad gannin arat dagh Farisaytan: "Ales wa igan arat wa, wer d-ifel Meshina felas wer isassahat ezel en tesanfawt-nana." ennan wiyyad: "Alghalamaten shin, manemmek as tanat-z-ag' awedan imosan anasbakkad?" Tezzar emmezrayan dagh talgha ten. 17 Tezzar elasan esestan n ales was kala ad idderghal ennan-as: "Kay a innan izzozay-kay ales dagh taddarghalt, emel-anagh aw'as tordegh as imos-tu." Inn-asan: "ennebi a imos."

18 eglan Farisaytan wer ezzegzanan as ales wa kala ad idderghal har du-sassaghran imarwan-net. 19 ennan-asan: "enta da da barar-nawan was tennam as d-ihew da iddirghal? Meni temewit tas igraw asawad-net emeredda?" 20 ennan-asan marwan n ales: "Nessan as barar-nanagh a imos, nessan entada as as d-ihew da iddirghal, 21 mishan wermad nessan temewit tas igraw asawad-net, za wala degh awedan wa t-isseswadan. Sestenat-tu iman-net, felas ales washaran a imos ifragan ad ammagrad dagh talgha ta tu-teqqalat." 22 Batu ta wer tat-egen marwan-net ar fel tekseda en muzaran en Kel-elyehud felas tenna a gan awedan kul wa iggeyyen as ghaysa a imosan elmesikh, wedi ad t-ekkesan dagh tiddawat en temezgedda en Kel-elyehud. 23 Awen da fel ennan marwan-net: "Tusharay-net teshishawad-tu dawan ammagrad dagh talgha ta tu-teqqalat, sestenat-tu."

24 elasan-du Farisaytan tegharay n ales was kala ad imos emedderghel ennan-as: "Iksad Meshina temela tidet. Nakkanay nessan as ales di anasbakkad." 25 Inn-asan ales wa: "Nak wer essena kud anasbakkad a imos wala. Arat iyyanda ghas dagh essana: as kala ad emosagh emedderghel, emeredda amaran ehannaya." 26 Deffer awen ennan-as: "Ma imos arat wa dak-iga? Meni esaway was kay isseswad?" 27 Inn-asan: "Arat wedi ya emalagh-awan-tu mishan wer di-tessesamam. Mafel as teram a dawan-t-elesagh emel? Meqqal ak kawanay da a teram ad teqqelam inalkiman-net ketnawan?" 28 erbadan-tu ennan-as: "Kay a imosan enalkim-net, nakkanay inalkiman en Musa a nemos. 29 Musa nessan as ishewal-as Meshina, amaran ales wedi wer nessen sas d-iha fadda."

30 Inn-asan: "Ales wa wer tessenam wala sas d-iha mishan izzozay-i dagh taddarghalt! Arat ya wa enta a isammaklalan wellen!" 31 Tessanam as Meshina wer iqebbel shiwatriwen en nasbakkadan. As das-ibberdag awedan, itamazal tara-net, eddi ad iqqabbal shiwatriwen-net. 32 Wer kala ad itawasla awedan issiswadan i d-ihewan ed taddarghalt. 33 ennar imos as ales di wer d-ifel Meshina, wer z' ifreg igi en wala." 34 Harashen-tu ennan-as: "Ko! Adis kay was as du-tehuwa da temosa tebeluleq n abakkad, kay a iran a dana-takfagh alfaydaten?" Tezzar estaghan-tu dagh adag wen.

Aytedan win edderghalnen dagh eddin

35 As isla ghaysa emazal wa igan da, tezzar iswad y ales wen har t-igraw inn-as: "Kay ak tezzigzana s Ag Awedan?" 36 Inn' ales i ghaysa: "emel-i a wa imos, emeli-nin, felas aregh a ser-es ezzegzena." 37 Inn-as ghaysa: "Tenayaq-qu, amaran enta dada dak-immegradan da." 38 Inn-as ales: "Ayew, emeli-nin, ezzigzanagh." Tezzar issejad-as.

39 Amaran inna ghaysa: "Nak assa a d-egegh eddenet fel ad agu esherigha, y ad eswedan win wer nehenney, addarghalan win hannaynen." 40 eslan arat dagh Farisaytan win der iddew y awa inna da ennan-as: "Dagh adi nakkanay da imedderghal a nemos?" 41 Inn-asan ghaysa: "ennar temosam imedderghal wer za tilem lahan, mishan dad imos as tegannim: "Nakkanay nehannay", wedi kawanay tellam-tu ed lahan."

 

ghaysa enta a imosan amadan wa olaghan

10 "eggiyyegh esilakanagh-awan as: Awedan wa wer neggez afarag n ayfed s emi-net, tezzar itaraggat-t-idu sas wer ila imi, wedi abaydag n ejajeb n azangaw a imos. 2 Amaran wa d-iggazan s emi n afarag, wedi enta a imosan amadan n ayfed. 3 enaghlif n afarag a z' aleman imi, essesemnat ayfed y emesli n amadan, ad igharru shin-net s esmawan-nasnat isardaq-qanat afarag. 4 As d-ighrad ikus en shin-net, a dasnat-izar, tezzar elkemnat-as, felas ezdaynat emesli-net. 5 As ig'awen awedan wa dasnat-imosan enaftagh, wer das-z-elkemnat, ewef fadda tu-z-aginat felas wer ezdaynat emesli-net." 6 elmital wa da dasan-iga ghaysa, mishan wer egren almaghna n awa dagh immegrad da.

7 Ilas ghaysa inn-asan: "eggeyyegh esilakanagh-awan as nak a imosan imi was raddaghnat ayfed. 8 Win dat-i d-osanen kul ibaydagan en jujab en zenga a mosan amaran wer dasan-essesamnat ayfed. 9 Nak a imosan imi. Wa ser-i d-iggazan ad afsu. Ifrag ad itaggaz iraddagh, igrew entada imensewan-net. 10 Abaydag wer d-itisu ar fel shikra, d igi en man d ehluk. Nak amaran ose-du fel ad egrewan aytedan temeddurt, egrewan-tat da za es temewit wer nela eddukad.

11 Nak a imosan amadan wa olaghan. Amadan wa olaghan iman-net a isamalkaw fel ayfed-net. 12 Mishan awedan was eteweghfar a iga fel ad iden ayfed, wer tanat-ila, wedi as ogga eridal izay-tanat-du, ad addaggag ayy-enat-in, tezzar abez dagh-asnat eridal awa ira, izewweziwez-tanat. 13 Arat wa itagg-ay ales wa felas eteweghfar a iga y esheghel wa, wer izlay a eganat ayfed. 14 Nak a imosan amadan wa olaghan. ezdayagh ayfed-in, ayfed-in degh ezdaynat-i, 15 zun emmek was di-izday Abba-nin, d emmek was t-ezdaya nak da. Iman-in simalkawaq-qan fel ayfed-in. 16 elegh ayfed shiyyad entada wer neha afarag wa. entanatay da kundaba azzaragh-asnat. Ad aslinat y emesli-nin, eqqelnat esegen iyyanda ilan amadan iyyanda. 17 Abba ir-i felas iman-in a sammalkawa fel a tan-elesagh agaraw. 18 Wer t-illa i dagh-i z'abezan iman, kalar iman-in a sammalkawagh es teradawt-in. elegh ferregat n esemmelkew-nasan, elegh da ferregat n agaraw-nasan tolas. enta da dagh arat was di-omar Abba-nin s igi-net."

19 Ilas ades en Kel-elyehud emezrey dagh talgha n aratan win igannu da. 20 A dagh-san aggen gannin: "Ales wa aggesuf a t-izdaghan! Awa emeskel! Mafel tessisamam-as?" 21 Wiyyad gannin: "Awedan izdagh aggesuf wer iteggu awal olan d awa. Tordam as ill-ay aggesuf ifragan eseswed en medderghal?"

ghaysa enta a imosan elmesikh, imos Barar en Meshina

22 Azzaman en tagrest, ewad-du emud en saktan n etewezezdag n Ahan en Meshina dagh Yerusalam. 23 Itijewenkit ghaysa dagh Ahan en Meshina dagh tarrayt tefalat as itawannu "ta n Suliman." 24 ghilayghalayan-tu Kel-elyehud win ellanen den gannin-as: "Kay ak har emmay wer dana-tore dagh aghaf? Kud kay elmesikh a temosa, tezelulegha-du tannagh-anaq-qu."

25 Inn-asan ghaysa: "ennegh-awan-tu, mishan wer di-tezzegzanam. Imazalan win ege s esem n Abba-nin, eggeyyen-i. 26 Mishan wer di-tezzegzanam felas wer tetabaqqem dagh ayfed-in. 27 Ayfed-in esallinat y emesli-nin, ezdayaq-qanat, amaran elkamnat-i. 28 ekfeq-qanat temeddurt teghlalat, wer ilkem ad okhsaynat, amaran wer t-illa i tanat-z-irkeban dagh efus-in. 29 Abba-nin wa di-tanat-ikfan, ogar i t-illan kul tezzewert. Amaran wer t-illa i tanat-z-irkeban dagh efus n Abba. 30 Nak d Abba arat iyyanda a nemos."

31 elasan-du ser-es adakal en tehun y ad t-anghin. 32 Ilas ghaysa inn-asan: "essiknaq-qawan imazalan aggotnen olaghnen a d-efalnen Abba. Meni dagh-san wa fel taram a di-tanghim?" 33 ennan-as: "Nakkanay wer nera tenaghay-nak fel as tegegh emazal olaghan, kalar emadraw wa tegegh eddi a fel kay za nanghu. Kay wer temosagh ar aggadem amaran taregh ad tagagh iman-nak Meshina."

34 Inn-asan ghaysa: "Ak elqanun-nawan wergegh iktâb dagh-as as inna Meshina:

"kawanay temosam meshinatan"?

35 Wer nefreg a din-neger arat wa ihan Iketban. Esem wa n meshinatan, ighra ser-es Meshina aytedan win tekka batu ta iga da. 36 Nak Meshina di-isannafranan izammazal-i-du s eddenet. Manemmek dagh adi as za tannim taggagh emadraw fel as enne: "emosa Barar en Meshina"? 37 As imos as wer teggagh imazalan win as di-d-issegla Abba-nin y a tan-aga, a di-wer-tezzegzenam. 38 Mishan dad imos as taggaq-qan, wedi kud ser-i wer tezzegzanam da, zegzenat kuddegh es mazalan win tagga, fel ad tessenam, tassantim entada egerri n as Abba irtay der-i, nak degh ertaya d Abba." 39 elasan agamay d abbaz-net, mishan ya igmad-tan.

40 Ilas ghaysa iki en tegadamayt ta hadat en Yordan, dagh adag wa dagh issenta Yakhya eselmegh n aytedan dagh aman, tezzar iqqim den da. 41 Osan-t-in aytedan aggotnen, gannin: "Yakhya wer iga alghalamat waliyyat, mishan aratan kul win danagh-inna s ales wa, emosan tidet." 42 Den dagh ad ezzegzanan aytedan aggotnen es ghaysa.

 

Iba en Lazares

11 Ill-ay ales irinan igan esem Lazares, ihan teghremt en Betaney s enta a dagh teghsar Maryama ed Marta emosnen shimedrayen. 2 Maryama ent'a tezwayat alwardi y emeli ghaysa, tezzar temas-as idaran-net es jekkad-net. Amaran amadray-net Lazares a irinan den. 3 Sassawaynat temedrayen-net emazal i ghaysa as: "emeli, emeri-nak irin."

4 Assagha wad isla ghaysa i salan win den, inna: "Teselkamt en tewerna ten, wer temos temattant en Lazares, arat a temos a z' assaknin atkul en Meshina, isennefilel-du entada atkul wa ila Barar en Meshina." 5 enta ghaysa ira Marta wellen, enta ed temadrayt-net, ed Lazares. 6 Isla as irin, mishan iga deffer awen eshin adan wer igmed edag wa iha. 7 Deffer adi inna i nalkiman-net: "endawat ad neqqel Yahudeya." 8 ennan-as nalkiman-net: "eshikh-nana, imuzaran-nana werge edes-nasan seket dada da gammayan ed tanaghay-nak, kay amaran taregh tewaghlay n akal wen?" 9 Inn-asan ghaysa: "ezel wergegh maraw alwaqan d eshin a imos? As ijiwankat awedan dagh azal, wer z' itinebetutew, felas ihannay ennur n eddenet. 10 Mishan as ijawankat awedan dagh ahad, ad itinebetutew, felas wer t-iha ennur."

11 Deffer as iga batu ta inna tolas: "emidi-nana Lazares insâ, ad aglagh a t-id-essenkera." 12 ennan-as nalkiman-net: "emeli, dad zamas insâ, wedi engem ad izzey." 13 enta ghaysa temattant en Lazares fel dasan-immegrad den, mishan entanay a ghilan etes wa n alghadat as igannu. 14 Tezzar izalalagh-du inn-asan: "Lazares aba-tu. 15 Amaran isidawat-i as wer elle sen dagh alwaq wedi, felas arat wa enta ser-wan du-z-aweyan a ser-i tezzegzenam. Mishan emeredda endawatanaq-qu." 16 Inkar Tuma was gannin Eknay, inna i nalkiman win hadatnen: "endawat nakkanay da danagh-iba neddew der-es."

ghaysa enta a imosan tanakra dagh temattant, imos temeddurt

17 As din-osa ghaysa ittemal-as as Lazares iga ekkoz adan dagh ezekka. 18 Betaney toray-du karad kilawtan es Yerusalam, 19 osan-in Kel-elyehud aggotnen Marta ed Maryama fel a dasnat-in-shewweshkenan dagh adag n amadray-nasnat.

20 As tesla Marta as ghaysa ihoz-du aghrem, tesselkad-as. Maryama enta teqqim-du dagh aghaywan. 21 Tenna Marta i ghaysa: "emeli, ennar telle da, wer z' iba amadray-nin. 22 Mishan emeredda da essanagh as arat kul wa tegmaya dagh Meshina a dak-k-agu." 23 Inn-as ghaysa: "Amadray-nam a d-inker dagh temattant." 24 Tenn-as Marta: "essanagh as amadray-nin a d-inker ghur tanakra n aytedan ezel a ilkaman." 25 Inn-as ghaysa: "Nak a imosan wa d-isankaran dagh temattant, emosa temeddurt. Awedan wa ser-i izzegzanan, wedi kud t-aba da a d-idder. 26 Amaran awedan kul wa iddaran izzigzan ser-i, wedi wer ilkem ad t-aba. Tezzigzanagh arat wedi?" 27 "Awalla" tenn-as, "emeli, ezzigzanagh as kay a imosan elmesikh, temosa Barar en Meshina, barar was emalan ketban as a d-as' eddenet."

Tanakra en Lazares dagh temattant

28 As tega Marta batu ta, tekka temadrayt-net Maryama, tewat-tat s ahal tenn-as: "eshikh illa-da, isastan der-em." 29 As tegraw Maryama isalan win, teggad-du, tesselkad i ghaysa. 30 As itagg'awen harwa da wer d-iggez aghrem, wer igmed edag wa daq-q-in-tosa Marta. 31 Kel-elyehud win ehanen ehan wen ellan ghur Maryama gammayan d esesmed-net, oggan-tat as du-teggad tarmad teqqab, tezzar elkaman-as eghilan ezekka a tekka y a fall-as tehallu.

32 As din-tosa Maryama edag wa iha ghaysa togg-ay, tezzar tefataqqat ghur daran-net, tenn-as: "emeli, ennar telle da, wer z-iba amadray-nin." 33 As tat-inay ghaysa tehallu, inay Kel-elyehud win der-es d-eddewnen entanay da ehallin, tezzar ikna teremmeq, eghshadan man-net. 34 Inn-asan: "Meni tu-tegam?" "emeli" ennan-as, "Ayaw eney." 35 Ad ihallu ghaysa. 36 ennan aytedan: "enawat awa der togda tara ta iga y ales-wa." 37 Mishan ennan wiyyad dagh-san: "Ales wa isseswadan emedderghel, wergegh ifrâg a ad igdel i Lazares temattant?"

38 Ikna ghaysa teremmeq tolas, tezzar ikk' ezekka. Awa ezekka imosan ezzenef n akazam, amaran tedbaq-qu tehunt zewwerat. 39 Inna ghaysa: "ekkesat-du tehunt!"

Tenn-as Marta ta n tamadrayt n ales w' aba: "emeli, ales di emeredda il'adu, felas ezel-net wa n ekkoz awa d anabal." 40 Inn-as ghaysa: "Wergegh ennegh-am as tezzegzana ad teneyagh tarna en Meshina?" 41 Tezzar tetawakkas-du tehunt. Iswad ghaysa dagh jennawan inna: "Abba, eggodayagh-ak as di-teqbala tewatray-nin. 42 Nak iman-in essanagh as faw da teqqabbala shiwatriwen-in. Mishan eshewalagh fel eddelil en tiddawat ta di-teghalayghalayat da, fel ad ezzegzenan as kay a di-d-izammazalan." 43 Deffer as iga batu ta, idkal emesli-net inna: "Lazares, egmed-du!" 44 Igmad-du enemmetten wa nad, ettalan fassan-net ed daran-net dagh tesewad, telsa tebdoq udem-net entada. Inn-asan ghaysa: "ekkesat-as itul tayyim-tu ad ijewenket."

¿imerkas shin tanaghay en ghaysa

45 Kel elyehud aggotnen a d-osanen Maryama enayan arat wa, ezzegzanan es ghaysa. 46 Mishan eglan wiyyad dagh-san ekkan Farisaytan emalan-asan arat wa iga ghaysa da. 47 Tezzar sassagan limaman win zawwarnen, ed Farisaytan emeni en muzaran ennan: "Ma za nagu? Ales wa itaggu alghalamaten aggotnen." 48 As tu-noyya itaggu aratan win, a ser-es ezzegzenan aytedan kul, tezzar asin-du Kel-errum addagdagan Ehan en Meshina, ezedan aghref-nana. 49 Inkar-du iyyan dagh-san igan esem Kayif, imosan elimam wa zewwaran dagh awatay wen, inn-asan: "Kawanay wer tegrem wala. 50 Wer din tegrem as ofa ad ammat awedan iyyanda dagh adag en tamattay fel ad wer immut eghref ketnet?" 51 Batu ta iga da wer tat-iga gar-es ed man-net, kalar tishit-net elimam wa zewwaran dagh awatay wen, a fel igraw elwelayat n as ghaysa kundaba immut fel eddelil n eghref ketnet. 52 Amaran werge aghref wen ghas a fel tu-z-iba, kalar bararan en Meshina kul win wazawaznen a du-z-ishidew ag-en zun teghessa iyyadda.

53 ezel wen da dagh egan muzaran en Kel-elyehud tanat ta n tanaghay-net. 54 Awen da felas ab-as itallam ghaysa dad ira dagh Kel-elyehud. Igmad akal wen, ikka iyyan akal iyyan inimahazan ed taneray, dagh eghrem igan esem Efrayem, iqqim dagh-as den da enta ed nalkiman-net.

55 Azzaman en amud en Kel-elyehud wa n Akkay ihoz-du. A du-tagazzayan aytedan aggotnen n akal wen kul, takkin-du Yerusalam, fel ad ezzezdegan dat emud. 56 Saggadan i ghaysa tinemennin gar-essan dagh Ahan en Meshina: "Kawanay ak ma tennam, tordam as wer du-z-asu amud wa fadda?" 57 enta ilimaman win zawwarnen ed Farisaytan omaran aytedan as i issanan edag wa iha ghaysa isaffagg-ay fel ad attarmas.

etewezway en ghaysa dagh Betaney

12 Sedis adan dat emud wa n Akkay ikka ghaysa Betaney, s enta dagh ikhsar Lazares wa d-issodar dagh temattant. 2 As din-osa ghaysa tawaggan-as megura olaghnen; tetaway-du Marta imensewan amaran Lazares iha aytedan win naghamanen ed ghaysa edrawan der-es. 3 Tezzar tobaz-du Maryama aganna en liter n alwardi iyyan ilan almaqam, izzewat wellen, tenghal-tu fel daran en ghaysa tezway-asan-tu, tezzar temas-tan es jekkad-net, idnay ahan wa adu n alwardi. 4 Inkar Yahuza Iskhareyuti wa n iyyan dagh nalkiman en ghaysa was enta tu-z-agin dagh fassan inna: 5 "Mafel wer din nezzenza alwardi wa nabez-du dagh-as azref en karadat temad n ezel n esheghel nakf-ay i teleqqawen?" 6 Arat wa wer t-inna fel tehanint en teleqqawen, kalar abaydag a imos, amaran enta a ittafan esegres wa itaggaz ezref, idakkal awa t-ihan. 7 Eges ya inna ghaysa: "Ayy-et! Alwardi wa kala da togaz-tu y ezel wa n etewenbal-in. 8 ¿ileqqawen faw da teddewam der-esnat, nak amaran wergegh faw elle ghur-wan."

Assa en ghaysa aghrem en Yerusalam

9 Tesla tiddawat tagget en Kel-elyehud as illa ghaysa den tezzar osan-in ehan wen, mishan werge ghaysa ghas din-ekkan, kalar awnaf a tan-ihan en Lazares wa d-issenkar dagh nemettan. 10 Tezzar esserdaghan-du limaman win zawwarnen tanat n ad anghin Lazares enta da, 11 felas eddelil-net a fel deffer-san efalan Kel-elyehud aggotnen ezzegzanan es ghaysa.

12 As affaw eslan aytedan aggotnen a d-ekkanen amud, as ghaysa iggaz-du aghrem wa n Yerusalam. 13 edkalan-du izelan en telazdaq tezzar eglan elkadan-as sagharen gannin:

"Hosanna! Tegrewaghet albaraka, kay a d-osan s esem n emeli,

kay emenokal n Israyil!"

14 Igraw ghaysa ehulel, iwan-tu, s asaway was iha awen Akatab wa innan: 15 "Ad wer teshewesha ya welet Syon*, emenokal-nam eddi a din-izayan eddi, iwan ehulel."

16 Inalkiman-net wer egren arat wa dagh tizarat, mishan assagha wad igraw ghaysa adkul-net, ektan-du as Akatab imal aratan win, amaran arat wa imal kul itiwag-as."

17 Tamattay ta temmegnet assagha wa dagh d-ighra ghaysa Lazares dagh tesaskawt issenkar-t-idu dagh temattant, teggeyyat-as. 18 Awen da fel das-du-tesselkad tiddawat, felas eslan as iga alghalamat ta. 19 Tezzar ad tinemennin Farisaytan gar-essan: "Toggam-tu? Indar-awan a der t-in tekkam, har as aytedan kul elkaman-as."

Emel wa iga ghaysa temattant-net

20 ellan-tu arat dagh Kel Tegerekt ehanen aytedan win d-eggezzaynen es Yerusalam y ad eghbedan dagh azzaman n emud. 21 ekkan iyyan dagh nalkiman en ghaysa igan Filibbus wa n teghremt en Betsayda ta n akal en Galilaya, ennan-as: "Negmay dagh-ak ad neney ghaysa." 22 Igla Filibbus imal y Andrawes, deffer adi iddew Andrawes ed Filibbus emalan arat wa i ghaysa. 23 Inn-asan ghaysa: "Alwaq ewad-du emeredda wa dagh z-igrew Ag Awedan adkul-net. 24 eggeyyegh esilakanagh-awan as tablalt n alkama as wer tertek dagh amadal temmut, ad taglu temos ghas-net, mishan as temmut, ad tag'ara aggen. 25 I iran iman-net ad t-egmedan. Amaran awedan wa iksanan iman-net dagh eddenet ta, wedi wer tu-z-egmedan kundaba eqqalan-as temeddurt teghlalat. 26 Awedan kul wa iran a di-ishghel, ilkemet-i, as iga adi edag wa ehegh enta a z-iggez, akf-ay degh Abba-nin almaqam.

27 "emeredda eghshadan man-in. Ma z-anna? Ak ad anna: "Abba safs-i dagh assaghat ta? Mishan wer d-ewedagh alwaq wa ar fel a fall-i agu. 28 Abba, sennefilel tela-nak adkul." Tezzar igmad-du emesli ijennawan inna: "Tela-nin adkul esinafalalaq-qat, amaran a tat-elesagh esennefilel."

29 Tamattay ta tellat den, tesla y emesli wa, a teghil eggag. Ad egannin wiyyad: "Angalos das-ishewalan da n emeredda." 30 Inn-asan ghaysa: "emesli wa wergegh eddelil-in a fel d-iga, kalar eddelil-nawan kawanay. 31 emeredda ad za tetewekhkem eddenet-ta. emeredda din z-iteweger emuzar n eddenet ta. 32 Amaran nak as tawasahake fel amadal ewara tegettawt, a d-elweyagh aytedan kul es man-in." 33 Batu ta isidagan ser-es esaway was tu-z-iba.

34 Tenn-as tamattay: "Nenay dagh ettawrit as elmesikh ad agu temeddurt teghlalat. Manemmek amaran as dana-za-tannagh Ag Awedan ad itewesehuket fel amadal? Ma imos Ag Awedan was tegannagh eddi?" 35 Tezzar inn-asan ghaysa: "ennur harwa da illa ghur-wan, har agin arat n azzaman, jewenketat iket di ad t-illa ennur fel a kawan wer eghdernat shiyyay, felas wa ijawanken dagh shiyyay, adi wer issen sas idag. 36 Iket telam ennur, zegzenat ser-es fel ad teqqelam bararan n ennur."

As ighrad ghaysa igi en batu ta, igla ilghas-asan dagh adag a iggugan.

Tezerest n esheghel wa iga ghaysa dat awedan kul

37 Alghalamaten aggotnen shin iga ghaysa dat-san, wer ser-san d ewaynat as ser-es ezzegzenan, 38 fel ad tekmal batu ta iga ennebi Isayas as inna:

"emeli, ma imos wa izzegzanan s arat wa nemal? Ma imos was tenafalal tarna n emeli?"

39 eddelil wa fel wer efregan ad ezzegzanan entada imal-tu ennebi Isayas as inna: 40 

Meshina a tan-isaddarghalan, isseghar iwallan-nasan,

fel ad ib-as hannaynat shittawen-nasan, ib-as garrin wallan-nasan,

fel a ser-es wer melelleyan izzuzey-tan."

41 Isayas inna aratan win felas inay adkul en ghaysa, amaran immigrad fall-as. 42 As ig'awen da imuzaran iman-nasan da a dagh-san aggen ezzigzanan ser-es, mishan fel tekseda en Farisaytan, wer ehelan emel n awen, felas wer eren ad tewekkesan dagh temezgedda-nasan, 43 amaran essofan saghmar wa n aytedan y edkul wa ihakku Meshina.

44 Idkal ghaysa emesli-net inna: "Awedan wa ser-i izzegzanan, werge nak ghas as izzegzan, kalar wa di-d-izammazalan da izzigzan ser-es. 45 Amaran wa dagh-i iswadan, adi wa di-d-izammazalan a dagh iswad. 46 Nak zun ennur a mosa, ekke-du eddenet yas i ser-i izzegzanan wer z' aqqam dagh shiyyay. 47 As isla awedan i batuten-in iqqim wer tanat-ittef, werge nak a tu-z-awwaddaban, felas nak efsan n aytedan a d-ekke s eddenet, wergegh attadib-nasan. 48 Dagh adi awedan kul wa di-olkan, iqqim wer iga tembay dagh batuten-in, wedi illa-tu wa tu-z-awwaddaban. Awal wa da ege da iman-net a das-z-ishreghan ezel a ilkaman. 49 Felas batuten-in werge ger-i ed man-in as tanat-ege, kalar Abba wa di-d-isseglan iman-net as di-omar s arat was ihor ad t-anna, ed was ihor a fall-as ammagrada. 50 essanagh as arat was omar enta a itawayan es temeddurt ta teghlalat. Dagh adi, arat wa fel emmegrada, emmek wa dagh as di-t-imal Abba enta as ser-es emmegrada."

Iba en ghaysa ed tanakra-net dagh temattant

eshired wa iga ghaysa idaran en nalkiman-net

13 Awa itaggu dat emud wa n Akkay. ghaysa issân as alwaq-net osa-du wa n agamad n eddenet iqqel Abba. ghaysa irâ aytedan-net ehanen eddenet, amaran emeredda ig-asan tara ta ghur d-eraznat.

2 Itamansaw ghaysa ed nalkiman-net ehad. As itag'awen da Iblis igâ dagh ewel en Yahuza wa n ag Simghon Iskhareyuti tekaddilt en ghaysa. 3 ghaysa issân as Meshina di n Abba igâ arat kul dagh efus-net, issân tolas as igmâd-du Meshina harwa ad t-iqqel. 4 Ibdad fel mensewan, tezzar ikkas takatkat-net ta n afalla, idkal afer igbas-tu, 5 tezzar iga aman dagh aghlal, ad isharad idaran en nalkiman-net, immas-tan s efer wa igbas da.

6 As d-ewad ghaysa Simghon Butros inn-as: " emeli, kay, a z-ishiredan idaran-nin?" 7 Inn-as ghaysa: "Awa tagga da wer tefrega egerri-net emeredda mishan a tu-tagra deffer awa." 8 Inn-as Butros: "Kay, ad teshireda idaran-in? Wala enemihaz!" Inn-as ghaysa: "As dak-tan- wer -eshorada nak der-ek nemmizzay." 9 Inn-as Simghon Butros: "Dagh adi emeli, werge idaran-nin ghas, shired harkid fassan d aghaf." 10 Inn-as ghaysa: "Awedan ishoradan, wer iddarar ar eshired en daran y ad izdag ketnet, amaran kawanay, tezeddigam, mishan werge ketnawan." 11 ghaysa issân wa tu-z-akkaddalan; adi a fel inna: "Wer tezeddigam ketnawan."

12 As ighrad ghaysa eshired en daran-nasan, izlag takatkat-net, iqqal edag-net, tezzar inn-asan: "Awak tegrâm awa dawan-ege da? 13 Tegannim-i "Amesesseghri" d "emeli", tegannim a olaghan, felas emosaq-q. 14 Dagh adi kud nak, imosan emeli d emesesseghri, eshorada idaran-nawan, iwar-kawan, kawanay da, dagh ilkam wa, ad tetimashiridam idaran. 15 eseknaq-qawan arat wen fel a tu-tetaggim kawanay da s emmek was dawan-t-ege. 16 eggeyyegh silakanagh-awan as, akli wer oger meshis, wala da ogar anammazal wa t-id-izammazalan. 17 Amaran dad tessanam aratan win, iket tefalawist a tat-tagim kudis tetamazalam-tan. 18 Wer dawan-genna ketnawan; win sannafrana kul ezdâyaq-qan mishan kundaba inda awa emalan elkettaban as ennan: "Wa der edrawa, iqqal amaksan-in". 19 ennegh adi emeredda harwa wer iga, y ad tezzegzenam, as iga, as nak emosa wa illan da. 20 eggeyyegh silakanagh-awan as wa iqbalan eyyan dagh nemmuzal-in, nak iman-in a iqbal. Harwa wa di-iqbalan, wa di-d-izammazalan a iqbal"

Emel wa iga ghaysa i tekaddilt ta tu-z-agu Yahuza

21 As inna ghaysa awen, eghshadan man-net, tezzar inna: "eggeyyegh silakanagh-awan as iyyan dagh-wan a di-akkaddal." 22 Ad tinemeswidan nalkiman-net, eqqânan ghafawan-nasan i was igannu. 23 Iyyan dagh nalkiman-net, wa isannahal ghaysa tara, isighamar dagh ihez n edmaran en ghaysa. 24 Isaddagan-as Simghon Butros ad issesten ghaysa ed was igannu. 25 Tezzar inaz-in analkim wen fel edmaran en ghaysa, inn-as: "emeli, ma z-iqqel?" 26 Ijewwab-as ghaysa: "Wa ekfe akarammu en tagella wa z-esselmegha dagh edrez a." Tezzar isselmagh akarammu en tegella ikfay i Yahuza ag Simghon Iskhareyuti. 27 Deffer as igrâw Yahuza akarammu en tegella wen, iggaz-tu Iblis. Tezzar inn-as ghaysa: "Tagaghet tarmad awa kay iwaran." 28 Mishan weleyyan dagh win der-es edrawnen wer igra awa fel das-inn'awen. 29 Weyyad ordân as, iduf wa iga Yahuza azref en nalkiman a fel das-inna ghaysa: "zanzad-du aùat was za naddarar y emud; madegh akfu shileqqawen arat iyyan." 30 Ibaz Yahuza akarammu en tagella, igmad tarmad, as itag'awen da ehad igâ.

Alwajib wa aynayan

31 As igmad Yahuza, inna ghaysa: "emeredda tarna en Barar n Awedan tenîfalal, tolas tarna en Meshina tenifalal dagh-as. 32 Kud tarna en Meshina tenifalal dagh-as, Meshina enta da ad isennefilel dagh man-net tarna en Barar n Awedan dagh alwaq ihozan wellen. 33 Imaran-in, alwaq wer negget a ghur-wan z-aga. A di-tegmiyam mishan edag wa ekkegh wer tefregam a t-in-tawedam. Kala ennegh adi i Kel elyehud amaran, kawanay da ennegh-awan-tu emeredda. 34 A dawan-aga alwajib aynayan: namariwat. Namariwat kawanay da s emmek was kawan-are. 35 Kud tanîmaram, adi a z-issusenan aytedan kul as kawanay inalkiman-in."

ghaysa ed Butros

36 Inn-as Simghon Butros: "emeli, menid tekke." Inn-as ghaysa: "Edag wa ekke, wer tefrega a di ser-es telkema emeredda, eges a din-telkema deffer awa." 37 Inn-as Simghon Butros: "emeli, mafel as wer efrega a dak ser-es elkema emeredda. egaragh iri y a fall-ak akfa iman-nin." 38 Inn-as ghaysa: "Adis a fall-i takfagh iman-nak? eggeyyegh silakanagh-ak as wer z-aghru ekeji aghora wer di-tenkura har karadat täklaten."

 

ghaysa enta a imosan tarrayt

14 Inn-asan ghaysa: "Ad wer teshewesham, zegzenat es Meshina, tezzegzenam ser-i nak da. 2 Ehan n Abba-nin ahân-tu daggan aggotnen en temekhsurt. Awak ennar wer iga adi manemmek as dawan-z-anna ad agla semmutegagh-awan edag tezdagham? 3 As tu-sammataga, ad eqqala, idawagh-in der-wan fel ad teggezam edag wa ehe. 4 Edag wa ekke tessânam tarrayt-net." 5 Inn-as Tuma: "emeli wer nessen dad tekke, manemmek as za nessen tarrayt-net?" 6 Inn-as ghaysa: "Nak a imosan tarrayt felas emosa tidet emosa entada wa ihakkan temeddurt. Awedan weleyyan wer in-z-awed Abba, ar s a di-d-immâr. 7 ennar di-tezdayam, tezdeyam Abba-nin enta da. Amaran emeredda tezdayam-tu, tolas tenayam-tu." 8 Inn-as Filif: "emeli, susen-anagh Abba, adi igd-ana." 9 Inn-as ghaysa: " Filif, eruwagh as der-wan eddewa, eges harwada wer di-tezdaya? Wer tessenagh as wa di-inayan, shilat n as inây Abba! Dagh adi manemmek as teganna: "Susen-anagh Abba?" 10 Wer tezzegzanagh as, nak d Abba nemos arat iyyanda? Batuten shin dawan-emmala da, werge nak ad d-egmadnat, kalar Abba der emosagh arat iyyanda ser-i isandan imazalan-net. 11 Zegzanat-i, nak d Abba arat iyyanda a nemos; kud wer tezzegzanam s awa enne, zegzenat fel eddelil en mazalan win as di-tenayam taggaq-qan. 12 eggeyyegh esilakanagh-awan as wa ser-i izzegzanan, entada ad agu imazalan shilat en win tagga. Fadda ad agu win tan-ogarnen, felas nak ad akkagh Abba. 13 Amaran a iqqal arat wa tegmayam s esem-in a tt-aga, fel ad teteweney tarna n Abba dagh Barar. 14 As dagh-i tegmayam arat a iqqal s esem-in, a tt-aga.

15 "Kud tara a di-tegam, tettefam alwajiban-in. 16 Amaran ad egmeya dagh Abba a kawan-akfu iyyan emeggi en telkhutbat a ghur-wan z' imelan har faw. 17 enta a imosan Infas wa isinefililan tidet, was wer tefreg eddenet elqebulat-net, felas wer tu-tehenney wala da tezday-tu; eges kawanay tezdâyam-tu felas ihhirag der-wan amaran ad iggez iwallan-nawan. 18 Wer kawan-z-ayya dagh eddenet temosam shilat en gugelan, a kawan-d-eqqela. 19 Deffer alwaq wer negget, eddenet wer di-za-teles anay; eges kawanay a di-telesam anay felas eddâra, amaran kawanay da ad tedderam. 20 Alwaq wedi ad tessenam as nak d Abba-nin arat iyyanda a nemos, tessenam entada as teham ewel-in nak da ahegh win-nawan. 21 Wa ittafan alwajiban-in, enta a di-iran. Wa di-iran at-t-iru Abba-nin, araq-qu nak da, tezzar essusenaq-qu iman-in." 22 Inn-as Yahuza wa wer nemos ag Iskhareyuti: " emeli, manemmek as dana-za-tessusenagh iman-nak nakkanay ghas, wer tan-tessosana y eddenet?" 23 Inn-as ghaysa: "Awedan wa di-iran, ad ittef awa enne, ir-ay Abba-nin, nas-ay-du nemel ghur-es. 24 Wa di-wer-nera, wedi wer ettef batuten-in; amaran batu tas tesallim da, werge nak a tat-igan kala ar shin Abba s enta a di-d-izammazalan.

25 "egegh-awan-tat harwa kawan-ehe. 26 Amaran Ameggi en telkhutbat imosan Infas wa Zeddigan wa dawan-du-z-assaglu Abba s esem-in, a kawan-isassaghru aratan kul, assakt-iwan-du arat kul wa dawan-enne nak iman-in. 27 Oyyegh-awan-d alkher, ekfeq-qawan alkher wa-nin; nak, wer dawan-t-ekfegh es temewit tas t-illa dagh eddenet; ad wer teshewesham wala teggez-kawan tasa. 28 Teslâm as dawan-e®®e: "Teklay a egegh", ennegh harwa "a kawan-d-eqqela". ennar ikhsâl as di-terâm, teseddewet-kawan tenna ta egegh: "eqqalagh Abba", felas Abba ogar-i. 29 Amaran aratan win emalagh-awan-tan emeredda harwa wer egen, fel a ser-i tezzegzenam alwaq wa ad z-agin. 30 Wer der-wan z-elesa igi en batu tagget, felas anakhkim n eddenet izay-du. Wer di-in-ikka d arat, 31 mishan kundaba egegh awa as di-omar Abba, tessen eddenet entada as aregh Abba." As ighrad batu inn-asan: "enkerat egmedatana edag a."

 

ghaysa enta a imosa esab n ezzebib wa n tidet

15 Inna ghaysa i nalkiman-net: "Nak a imosan esab n ezzebib wa olaghan, Abba-nin imos meshis. 2 Aledlid-in kul wa wer netirew ad t-ikhtes, wa itarawan ad t-ifnez fel ad d-inzer agu ara aggen. 3 Zund adi da, kawanay da eway-du ser-wan awal-in tazdak; 4 agiwat der-i tarteyt shilat en ta der-wan ege, zund as azel wer z arew ghas-net as d-iqqetas dagh ashek; kawanay da elmital di da a teham as der-i wer tertayam.

5 "Nak a imosan esab n ezzebib, kawanay iledlad-net. Wa der-i igan tarteyt ta der-es ege, a t-idu-tegmed tenfa tagget felas as dagh-i in-teqqetasam wer tefregam wala. 6 Wa der-i wer nertay, a din-iteweger shilat n eledlid iqqitasan, aqqar, itewekemmed-du, iteweger dagh temse, ibelegleg. 7 As der-i tertayam, tettafam batuten-in, egmiyat dagh Meshina di n Abba arat kul wa teram, a tu-tegrawam. 8 enta da awa as tetawanay tarna n Abba-nin: a du tarewam tenfa tagget, assaknu adi as temosam inalkiman-in. 9 Tara ta di-iga Abba, enta a dawan ege; a tat-wer-tegmedam. 10 Kud tettafam alwajiban-in, wedi teham tara-nin zund emmek as nak da ettafa win Abba, ehe tara-nnet.

11 "ennegh-awan adi fel at tagim tedewit ta-nin, amaran da, at tandu tedewit-nawan. 12 enta da alwajib wa-nin: "Namariwat s emmek was kawan-are." 13 Wer tu-tella tara togarat ad akfu awedan iman-net fel midawan-net. 14 Kud tetaggam awa as kawan-omara, wedi kawanay imidawan-in. 15 Wer dawan-gannagh eklan, felas akli wer itessen arat wa itag meshis. Kala kalar egegh-awan esem imidawan-in, felas awa as eslegh ghur Abba-nin kul essosanagh-awan-tu. 16 Wer di-tasannafranam, eges kawanay, nak a kawan-isannafranan; esiwaraq-qawan at taglim, tarewam-du tenfa tagget a za tahagit. eddi a tegmayam dagh Abba s esem-in a dawan-t-agu. 17 Omaraq-qawan s ad tenemerim.

18 "Kud gezzar a kawan-tega eddenet, essenat as tegzâr-i dat-wan. 19 Kud kawanay eddenet kawan telat, wedi eddenet tara wa tela; mishan wer kawan tela, felas nak kawan dagh-as d-isannafranan, adi a fel kawan tegzar. 20 Aktiwat-du awa dawan-ennegh, as: "Akli wer oger meshis"; kud esseknan-i alghazab, a dawan-t-assaknin kawanay da; kud ettafan awal-in, kawanay da, ad ettefan wa-nawan. 21 Eges adi kul, eddelil-in a fel dawan-tu-z-agin; felas wer essenan wa di-d-izammazalan.

22 "ennar du-wer-ose, eshewalagh-asan, wer z' attarmasan es bakkadan-nasan, eges emeredda wer t-illa esaru weleyyan a dasan-z-igdelan a ser-san attarmasan. 23 Wa di-igzaran, igzâr Abba-nin enta da. 24 ennar wer ege gar-essan imazalan es wer t-illa awedan as kala tan-iga, wer z' attarmasan es bakkadan-nasan. enayan-tan emeredda eges eglan, egzaran-ana nak d Abba-nin. 25 Mishan adi iga fel at tandu batu ta tennat dagh elkettaban n ennebitan: "egzaran-i bannan." 26 As d-osa emeggi en telkhutbat wa dawan-du-z-assagla ghur Abba, imosan Infas wa isinefililan tidet a ser-wan-du-z-igmedan Abba, a fall-i aggayyat. 27 Kawanay da, a fall-i taggayyem, felas teddewam der-i harwa dagh tizarat."

16 "emalagh-awan adi fel a kawan-wer-igmed ezegzan-nawan. 2 Ad tetewekkesam dagh temezgeddawen en Kel-elyehud, fadda ilkâm alwaq dagh-as wa dagh-wan ikkasan iman, illa ghur-es as Meshina as iga tara-net. 3 Adi a dawan-z-agin aytedan felas wermad a di-ezdayan wala essânan Abba. 4 emalagh-awan aratan di emeredda, fel a tan-du-taktim as d-ewad alwaq wa dagh z' agin aytedan tara-nasan. Aratan win wer dawan-tan-emela dagh tizarat n esheghel-in ghur-wan, felas alwaq wedi harwada eddewa der-wan.

esheghel n Infas wa zeddigan

5 "emeredda ad eqqela wa di-d-izammazalan, mishan wer kawan iha i di-issestanan ed dad ekke. 6 Eges eknan man-nawan akhshud felas dawan-enne adi. 7 Der iga adi da, a dawan-emela tidet: of-awan ad agla, felas as wer egle wer kawan-du-z-asu emeggi en telkhutbat, mishan as egle a dawan-t-id-assagla. 8 As d-osa ad assaknu aytedan n eddenet as ekhrâkan dagh batu n awa imosan abakkad, d awa imosan alghadala en Meshina d esherigha-net. 9 ekhrâkan dagh batu n awa imos abakkad felas tugeyt s a egan a ser-i ezzegzenan; 10 ekhrâkan dagh batu n awa imosan alghadala felas tewaghlay a egegh Abba amaran wer i-za-telesam anay; 11 ekhrâkan dagh batu n awa imosan esherigha en Meshina felas anakhkim n eddenet, a t-imosan Iblis, ibâz-tu esherigha.

12 "Harwada ele batuten aggotnen as are a dawan-tanat-aga eges wer asnat-tezmeram emeredda. 13 As d-osa Infas wa isinifililan tidet, a kawan-isselkem i tidet kul ta du-tefalat Meshina felas batuten-net wer t-idu-z-egmednat, awa as z-aslu ghas a dagh dawan-z-ishiwel ketnet, imel-awan aratan win d-ezaynen, 14 izezwer-i felas isalan-in win z-igrew ghas a dawan-z-imel. 15 Awa iqqalan Abba ketnet iqqal-i nak da; adi a fel enne, isalan-in win z'igrew Infas wa Zeddigan a dawan-z-imel.

Tekenzert en nalkiman teqqal tedewit

16 "A dawan-egmedagh anay deffer alwaq wer negget, mishan a di-telesam anay dagh adan wer negget deffer adi." 17 Tezzar namannan weyyad dagh nalkiman-net: "Ma imos almaghna n awa danagh-inna da? "A dawan-egmedagh anay deffer alwaq wer negget, mishan a di-telesam anay dagh adan wer negget deffer adi ?" enta da ma imos almaghna n "Abba a ekke"? 18 Ma imos almaghna en "dagh alwaq wer negget" wa immal da? Wer nessen awa as iha batu-net"

19 Issan ghaysa as erân at-t-esestanan. Inn-asan: "Tetinamasestinam felas enne: "A dawan-egmedagh anay deffer alwaq wer negget, mishan a di-telesam anay dagh adan wer negget deffer adi" 20 eggeyyegh silakanagh-awan as at-talim, tesekkelelam mishan as itag adi aytedan n eddenet entanay eddewen. Ad ekhshedan man-nawan eges akhshud di a tu-tezrey tedewit. 21 Tantut as iqqal tetaggaz amadal, ad ekhshedan man-net fel aggad wa du-tega alwaq-net; mishan as d-ihu barar-net, at-tammazzay d esemmedren dagh arkanay wa tenay, iseddewat-tat as du-tegga awedan dagh eddenet. 22 Kawanay da zund adi da, emeredda ekhshâdan man-nawan, mishan a kawan-elesagh anay, ezel wedi at tagim tedewit as tu-wer-illa i dagh-wan tat-z-ikkesan. 23 Wer-i-za-tessestanam d arat weleyyan ezel wedi. eggeyyegh silakanagh-awan as, a tegmayam dagh Abba s esem-in a dawan-t-agu. 24 Harwada wer t-illa a tegmâyam s-esem-in. egmiyat at tegrewam fel at tagim tedewit tekmâlat"

ghaysa irza eddenet

25 "emâlagh-awan adi es shashelan, mishan ilkâm alwaq dagh awan-wer-z-elasagh emel n arat weleyyan wa iqqalan Abba es shashelan, a dawan t-emela s awa imos. 26 ezel wedi at tegmeyam dagh Abba s esem-in. Wer awan-enne a dawan dagh-as egmiya, 27 felas Abba iman-net ir-iwan felas di-teram, enta da tezzigzanam as ghur-es d-egmâda. 28 Abba a ghur d-egmada, ose-du eddenet amaran emeredda a tat-egmeda eqqelaq-q."

29 Tezzar ennan-as nalkiman-net: "eney, emeredda temmalagh-anagh aratan s awa mosan, werge es shashelan. 30 emeredda nessan as tessânagh dagh arat kul, wer t-illa arat a iqqal a dak-ighbaran; adi da a fel nezzegzan as Abba a ghur du-tegmada." 31 Inn-asan ghaysa: "Adis emeredda tezzegzanam?" 32 eneyat, alwaq ihoz, fadda iga, wa dagh za tetewweziwezam, akkiyyan akku aghaywan-net, tayyim-i-d ghas-in; mishan ya wer emosa ghas-in felas illa ghur-i Abba. 33 emalagh-awan arat wa fel at tegrewam alkher dagh terteyt ta der-i tegam. At teniyam arkanay dagh eddenet, mishan iliwat ewel, felas erzegh eddenet."

 

Tewatray en ghaysa i nalkiman-net

17 As inna ghaysa awen, idkal asawad-net sa ser jennawan, tezzar ittar inna: " Abba, alwaq ewad-du, saknu tarna en Barar-nak fel ad assaknu enta da ta nak, 2 id tezzozaraq-qu y aytedan kul fel ad akfu temeddurt ta teghlalat i win tu-tekfe. 3 Amaran enta temeddurt ta teghlalat awa tat-imosan, ad inefilel y aytedan awa temosa, kay ghas Meshina wa n tidet; inefilel-asan entada as ghaysa elmesikh a du-tezammazala. 4 essikna tarna-nak fel amaæal s esendi wa ege esheghel was di-tessewaragh ezuk-net. 5 Amaran emeredda kay Abba, akf-i ghur man-nak tarna ta ghur-ek elegh harwa dat ekhluk n eddenet. 6 Sinafalala awa temosa y aytedan win du-tesannafrana teskataq-qan-du dagh eddenet, tegeq-qan dagh efus-in tezzar ettafan awal-nak. 7 emeredda essanan as arat kul wa di-tekfe, kay a ghur d igmad. 8 Felas emalagh-asan awa di-tenne, eqbalan-tu, amaran silakanan as kay a ghur d-egmada, ezzigzanan degh as di-du-tezimazala. 9 Wer kay tinseya y aytedan win eddenet, kala ar win di-tekfe a fel kay tansayagh felas emosan i-nak. 10 A wa ele kul i-nak, kay da a wa tele kul i-nu; amaran tarna-nin tetiwanay dagh-san. 11 Nak, ab-as ahegh eddenet, kay a din-ekke, mishan entanay ehan-tat. Ya Abba di zeddigan, agez-tan s esem-nak, a di-tekfê, fel ad eqqelan arat iyyanda shilat en wa der-ek emosa. 12 Harwa tan-ehe, ogâzaq-qan s esem-nak, a di tekfê, wer dagh-san ikhrek waliyyan ar wa ikhrakan fel ad andu awa ennan Ketban. 13 emeredda kay a din-ekke, ganna awa harwa ehegh eddenet fel ad agin tedewit tendât shilat en ta ege. 14 emalagh-asan awal-nak tezzar tegzar-tan eddenet felas wer tan-tela zund as nak iman-in wer di-tela. 15 Wer dagh-ak egmaya a tan-tekkesa dagh eddenet, mishan egmaya dagh-ak a tan-tageza dagh Iblis. 16 Wer tan-tela eddenet, zund as nak iman-in wer di-tela. 17 Zezdeg iwallan-nasan s awal-nak imosan tidet. 18 ezemmizel wa di-du-tege s eddenet, enta a tan ser-es ege nak da. 19 Amaran ekfeq-qay iman-in fel eddelil-nasan fel ad akfin win-nasan entanay da es tidet. 20 Werge inalkiman-in ghas as kay tansaya, kalar tansayaq-qay entada y aytedan win ser-i z' ezzegzennen fel as eslan y awal-nasan. 21 egmaya dagh-ak a tan-igan ket-nasan arat iyyanda s emmek was der-ek t-emosa; neqqel-tu der-san nakkanay da fel ad tezzegzen eddenet as kay a di-d-izammazalan. 22 ekfeq-qan tarna ta di-tekfe, fel ad eqqelan arat iyyanda zun awa nemos nak der-ek, 23 nak ertâya der-san, kay tertâya der-i, fel ad eqqelan arat iyyanda es temewit tendât tezzar tessen eddenet as kay a di-d-izammazalan harwa tegegh-asan tara ta di-tege. 24 Abba, a ere as win di tekfe ad eggezan entanay da edag wa ehe fel ad ehannayan tarna ta di-tekfe felas di-tare harwa dat ekhluk n eddenet. 25 Abba, meshis n alghadala, eddenet wer kay-tessen eges nak essanaq-qay amaran inalkiman-in, essânan as kay a di-d-izammazalan. 26 essosanaq-qan awa temosa amaran wer z'ammazzaya d adi, fel a tan-teggez tara ta di-tege, erteya der-san.

 

etermes en ghaysa

18 As iga ghaysa batu ta, ikka tama ta hadat n egirer wa n Kedron. Iggaz egoras illan-den enta ed nalkiman-net. 2 Yahuza Iskhareyuti wa z'akkaddalan ghaysa issan edag wen, felas iyyewan dagh-as ghaysa emeney enta ed nalkiman-net. 3 Tezzar iddew Yahuza ed taqqamt tagget en sojitan en Kel-errum, ed magazan n Ahan en Meshina win d-esseglan limaman win zawwarnen, ed Farisaytan, ewayan fetelaten, ed belan, ed tezoli-nasan. 4 Ihoz-tan-in ghaysa, felas issân dagh arat kul wa tu-z-igrewan, issestan-tan inn-asan: "Ma imos was tesaggadam?" 5 ennan-as: "ghaysa wa n Nazaret as nesaggad." Inn-asan: "Nak da da." Ibdad gar-essan Yahuza wa t-ikkeddalan. 6 Amazay wa da dagh dasan-inna ghaysa: "Nak da da" enta dagh ehagan eqqalan deffer-san har udan. 7 Ilas ghaysa inn-asan: "Ma imos was tesaggadam?" ennan-as: "ghaysa wa n Nazaret as nesaggad." 8 Inn-asan: "Wergegh ennegh-awan nak da da. Dagh adi kud nak as tesaggadam, tayyim aytedan win ad jewenken. 9 emmek wen da as inda awal wa iga dat awen as inna: "Wer dagh-i ikhrek waliyyan dagh win di-tekfe." 10 Ila Simghon Butros takoba, tezzar ilbay-tat-du iwat ser-es akli n elimam wa Zewwaran, ifras-du temezzuk-net ta n eghil. Akli wa esem-net Malkhus. 11 Inna ghaysa i Butros: "Sughel takoba-nak teterut! Ak ad aqqama wer egegh alghazab wa di-otas Abba?"

etewesebdad en ghaysa dat limaman

12 Tezzar obazan ghaysa ekradan-tu. emosan taqqamt en sojitan en Kel-errum d emuzar-nasan, ed magazan n Ahan en Meshina win d-esseglan muzaran en Kel-elyehud. 13 Ewayan-tu estizarat s ahan en KHânan wa n edaggal en Kayif wa imosan elimam wa Zewwaran dagh awatay wen. 14 Amaran Kayif enta a igan i muzaran en Kel-elyehud tanat ta n as ofa ad ammat awedan iyyanda dagh adag en tamattay. 15 Ilkam Simghon Butros i ghaysa enta d enalkim iyyan. enalkim wa izday elimam wa Zewwaran iman-net, tezzar iggaz afarag wa ighlayan aghaywan n elimam wa Zewwaran dagh amazay wa da daq-q'iggaz ghaysa. 16 Butros enta iqqim-du dat ahan, ghur emi n afarag. Irdagh-du enalkim wen, igraw ghur tentut ta togazat tesehert ad tayyu Butros s iguz n aghaywan. 17 Tezzar tenna temashaghalt ta togazat imi n ahan i Butros: "Werge kay da iyyan dagh nalkiman n ales wa a temosa?" Inn-as: "Wer t-emosa." 18 Asamed iga. ghilayghalayan eklan ed magazan n Ahan en Meshina temsay en temakaten esukusan ser-es. Ik-en-in Butros enta da ad isukus. 19 Issestan elimam wa Zewwaran ghaysa dagh talgha en nalkiman-net, d esesseghri wa itaggu. 20 Inn-as ghaysa: "Awal wa ege y eddenet, wer imos arat ighbaran. Faw da inan en tagharay d Ahan en Meshina dagh sassaghra dad eddewan Kel-elyehud kul, amaran wer t-illa awal ege dagh essir. 21 Mafel as di-tesastana? Sesten aytedan win di-eslanen d arat wa fel dasan-emmegrada; entanay essanan dagh arat wa enne." 22 As inna ghaysa arat wa, iqqas-as iyyan dagh magazan n Ahan en Meshina ibdâdan den, inn-as : "Esaway wa da as tetajawwaba y elimam wa Zewwaran?" 23 Ijjewwab-as ghaysa inn-as: "Kud arak batu a ege, emel-i edag wa daq-qat-ege. Kud amaran egegh batu tolaghat, meni eddelil wa fel di-teggata?" 24 Isserdaq-qu KHânan, da ikrad, issok-ay Kayif wa n elimam wa Zewwaran. 25 Assaghat ten, Simghon Butros illa den da isukus es tamsay. Itawann-as: "Werge kay da arat dagh nalkiman n ales wa a temosa?" Inn-asan Butros: "Kala kala wer t-emosa." 26 Inkar-du iyyan dagh eklan n elimam wa Zewwaran, imosan esheqqagh n ales was d-ifras Butros temezzuk-net, inn-as: "Wergegh enayaq-qay teddewa der-es dagh egoras?" 27 Ilas Butros ennukra n arat wen. Amazay wen da dagh ighra ekeji aghora.

etewesebdad en ghaysa dat Bilates

28 Immeway ghaysa ghur Kayif s aghaywan n emuzar n akal. Arat wa itaggu ghur eferirey n anay. Win der-es d-eddewnen wer eggezan ehan wa n emuzar n akal, fel ad ettefan tazdak-nasan y ad atshin amensay wa n Akkay. 29 Awen da fel d-igmad Bilates wa n emuzar n akal ehan-net, ikk-en-du inn-asan: "Ma imos lahan wa fel tebazam ales wa?" 30 ennan-as: "ennar wer imos aw tekma, wer dak-k-idu-za-nawey" 31 Inn-asan Bilates: "Aweyat-tu tekhkemam-as s elqanun wa-nawan." ennan-as Kel-elyehud: "Nakkanay wer nela turagat en tanaghay n awedan." 32 Arat wa itaggu fel ad andu awal wa iga ghaysa assagha wa ad imal ennugh en temattant ta z-agu. 33 Tezzar iqqal Bilates ehan-net ighra ghaysa issestan-tu inn-as: "Kay a imosan emenokal en Kel-elyehud?" 34 Inn-as ghaysa: "Arat wa kay iman-nak as tu-tenne, megh ak aytedan wiyyad a dak-k-ennanen ser-i?" 35 Inn-as Bilates: "Un nak iyyan dagh Kel-elyehud a mosa? Tamattay-nak, ed limaman win zawwarnen a kay d-ewaynen ser-i, ma imos arat wa tekhshada?" 36 Ijjewwab-as ghaysa inn-as: "Taghmar-in wer tat-tela eddenet ta da. ennar taghmar-in shin eddenet ta da, enkernat-du teghurad-in eknesnat fel ad wer eggezagh ifassan en Kel-elyehud. Kala kala, igmad ashak as taghmar-in wer tat-tela eddenet ta da." 37 Inn-as Bilates: "Dagh adi kay emenokal?" Ijjewwab-as ghaysa inn-as: "Kay iman-nak a innan: Nak emosagh emenokal. Arat da wa fel d-ehewa amaran enta fel d-eggazagh eddenet: assa a d-ege y ad aggayyegh es tidet. I imosan aw tidet, kul issisam y awal-in." 38 Inn-as Bilates: "Ma temos za tidet?" Deffer adi iqqal Bilates Kel-elyehud inn-asan: "Fel aganna wa di-iqqalan za, nak wer ehenneya lahan waliyyan dagh ales wa. 39 Mishan ya, dagh arat wa imosan alghadat-nawan as faw da as d-ewad emud wa n Akkay a dawan-d-ekkesagh iyyan dagh meskesa-nawan. Teram a dawan-d-ekkesagh emenokal en Kel-elyehud?" 40 Saghgharen-du ket-nasan ennan-as: "Kala, kala, wergegh enta! Barabbas as nera danaq-q-idu-tekkesa." Barabbas wa ejajeb n anasgafa a imos.

19 Tezzar omar Bilates s ad tewegginat tewit n elekkud i ghaysa; itawagg-as awen da. 2 ezdän sojitan tekebbut tegat es shennanan essewaran-tat eghaf-net, ezzezlagan-tu entada ebernuz zaggaghan. 3 Tihazan-t-in gannan-as: "Oyyik! emenokal en Kel-elyehud!" Taggan-as shiqqas. 4 Ilas Bilates irdagh-du, inna i Kel-elyehud: "enawat! A dawan-t-id esserdegha, ad tessenam as wer fall-as enaya lahan waliyyan fel iwweddab." 5 Tezzar irdagh-du ghaysa tewar-tu tekebbut en shennanan, izlag ebernuz zaggaghan, inn-asan Bilates: "enta da ales." 6 As t-oggan limaman win zawwarnen ed magazan n Ahan en Meshina, ad sagharen gannin: "Taytay-tu fel shilelt! Taytay-tu fel shilelt!" inn-asan Bilates: "Abezat-tu kawanay iman-nawan tattaytayam-tu, nak wer henneyagh eddelil waliyyan fel t-ewweddaba." 7 ennan-as muzaran en Kel-elyehud: "Nakkanay nela esherigha, amaran esherigha wa, ih-ay as ales wa ihor ed temattant, felas a inna enta Barar en Meshina a imos."

8 Batu ta teshota tasa dagh Bilates, 9 tezzar ilas iguz n adag wa n esherigha, inna i ghaysa: "Menis du tehe?" Mishan wer das-iga ghaysa aljawab waliyyan. 10 Amazay wen da das-inna Bilates: "Nak as tugaya s a di-teshiwela? Wer tessenagh as ele ferregat n a kay-ayya, elegh entada ferregat n a kay-attaytaya fel shilelt?" 11 Inn-as ghaysa: "Wer fall-i tele tarna waliyyat ar ta ser-ek du-tefalat Meshina. A di da felas awedan wa di-igan ger fassan-nak, ogar-kay igi n abakkad." 12 Amazay wen da dagh iggaz Bilates shin agamay n asaway was z'ayyu ghaysa. Mishan enkaran-du Kel-elyehud ad sagharen gannin-as: "As toyyegh ales wedi, adi za wer temosagh emidi en Kisra, emenokal en Kel-errum, felas awedan wa innan imos emenokal, wedi azangaw en Kisra a imos!"

13 As isla Bilates i batuten shin, isserdagh-du ghaysa, tezzar iqqim dagh tekhawit ta n adag n esherigha. Edag wedi esem-net "Agharghar ilsân teselit" itawann-as dagh telghibranit "Gabbata". 14 Imos awen ezel wa oggan amud wa n Akkay, ammasnazal, amaran taggin mutag. Inna Bilates i Kel-elyehud: "emenokal-nawan eddi!" 15 Eges eggazan shin tegharaten ad gannin: "Angh-ay! Angh-ay! Taytay-tu fel shilelt!" Inn-asan Bilates: "Dagh adi ad attaytayagh emenokal-nawan fel shilelt?" ennan-as limaman win zawwarnen: "emenokal-nana wer t-imos ar Kisra." 16 Tezzar issellam i sojitan ghaysa y ad t-attaytayan fel shilelt.

eteweteytay en ghaysa fel shilelt

Tezzar ezzergazan sojitan ghaysa. 17 Igmad aghrem eway enta iman-net shilelt ta fel z-attaytay. Ikka tekashwart tas itawannu "Tekeyya", itawann-as dagh telghibranit "Golgota". 18 Den da ad etteytayan sojitan ghaysa fel shilelt. etteytayan eshin meddan wiyyad entanay da fel shilelen, iyyan iggaz aghil en ghaysa, wa hadan iggaz zalgat-net. 19 Omar Bilates s ad ammatkal esellum itewekteb fall-as "ghaysa wa n Nazaret, emenokal en Kel-elyehud", iteweseltegh i shilelt. Itawagg' awen da. 20 Kel-elyehud aggotnen eghran esellum wa. enta edag wa dagh itteytay ghaysa fel shilelt ihoz aghrem, amaran esellum wa iktab dagh awalan win telghibranit, ed telatint ed tegerekt. 21 ennan limaman win zawwarnen en Kel-elyehud i Bilates: "Ad wer tekteba fel shilelt as: "Ales wa emenokal en Kel elyehud", kalar ekteb fall-as as: "ales da wa innan enta a imosan emenokal en Kel-elyehud." 22 Inn-asan Bilates: "Arat wa ektaba, wer-tu-za-semmetteya."

23 Assagha wad ettitayan sojitan ghaysa fel shilelt, edkalan iselsa-net, egan-asan ekkozat tezunen, ekkullu n iyyan dagh-san igraw iyyat. edkalan entada tekatkat-net ta zewwarat, tegat dagh tebdoq wer iha a imosan azamay, tosagh-du ghur afalla har eres. 24 ennan gar-essan: Ad wer nezezzerret tekatkat ta, ofa ad nagu shishagheren fel wa tat-z-ilen. Arat wa ennan-tu fel ad andu awal ihan Iketban n ennebitan. Awal wa inna:

"ezunan tabdoq-in, tezzar egan shishagheren fel tekatkat-in"

Arat wen enta iman-net a egan sojitan. 25 Tegettawt ta fel itteytay ghaysa, ebdadnat dagma-net tedoden emosnen anna-net, ed tamadrayt n anna-net, ed Maryama ta n tentut en Klobas, ed Maryama ta n Magdala. 26 Ogga ghaysa anna-net, inay enalkim-net wa n emeri-net ibdad dagma n anna-net, inn-as: "Anna, barar-nam eddi". 27 Tezzar inna y enalkim-net wen: "Anna-nak eddi". Amazay wen da dagh der-es iddew enalkim wen s aghaywan-net issan dagh-as.

28 Deffer awen inna ghaysa: "Ih-i fad", felas issan as arat kul ikmal, amaran batu ta wer tat-iga ar fel ad andu awal ihan Iketban n ennebitan. 29 Edag wa insa dagh-as eghezu iha esmad kezberan wellen, temmetkal shikest tettal d emi n alawag n ezzenef n ennighnagh iyyan idwâlan as itawannu KHisob, itawasalmagh-du dagh esmad wa, tezzar itawazzal-in s emi-net. 30 As izannalmaz ghaysa esmad wa kezberan a, inna: "Arat kul ikmal." Tezzar isseras eghaf-net, egmadan-tu man.

etewegga en ghaysa dagh tesaskawt

31 ezel wen taggin mutag n emud wa n Akkay. Kel elyehud wer eren ad aqqaminat alzanazaten n aytedan ewarnat shilelen dagh ezel wa n tesanfat-nasan. enta ezel wen, wer ogda ed win hadatnen tezzewwert. Tezzar eglan essestanan Bilates ennan-as: "Amer s ad tawarzin daran-nasan, fel a tan-iba tarmad, tessukesa-du alzanazaten!" 32 ekkan-du sojitan meddan win tawataytaynen dagma en ghaysa. erzan idaran en wa azzaran, okayan es wa n eshin egan-as awen da. 33 As d-ewadan ghaysa enayan as as d-osan da aba-tu. Tezzar eqqiman da wer erzen idaran-net. 34 Mishan idag iyyan dagh sojitan win tasaga en ghaysa, isakharabbat-tat s allagh-net. Amazay wen da dagh-as d-iffay ezni d aman. 35 Awedan wa igan isalan win, inay-tan es shittawen-net, amaran tegeyya-net tidet a temos. Issan as tidet ta tezdarat as ishewal da, fel ad tezzegzenam kawanay da. 36 enta aratan win kul wer egen ar fel ad andu awal ihan Iketban n ennebitan. Awal wa inna:

"Wer z-arraz waliyyan dagh ghasan-net."

37 Awal wa ihan Iketban n ennebitan ih-ay entada as:

"Ad essedegan isawadan-nasan sa ser wa sakhkharabben."

38 Deffer adi osad-du Yusef wa n eghrem n Arimatay, imosan iyyan dagh nalkiman en ghaysa, eges dagh essir, felas iksud Kel-elyehud. Ikka Bilates igmay dagh-as ad awey alzanazat en ghaysa. Ikf-ay Bilates turagat n awen, tezzar igla eway alzanazat. 39 Osa-ddu Nikodemos enta da, s enta as kala din-osa ghaysa ahad iyyan dat awen. Eway-du amadal en karadat temerwen en kilaw en tefarshit dagh enghalan alwarditan. 40 Idkal-du Yusef ed Nikodemos alzanazat en ghaysa egan-tat dagh shifit tegat dagh tesewad, esselalan-tat adutan ezodnen. Arat wa imos alghadat en Kel-elyehud dagh anabal en nemmettan.

41 Edag wa dagh itawataytay ghaysa fel tegettawt ih-ay afarag. Amaran afarag wen teh-ay tesaskawt taynayat as wer kala tat-iggaz enemmetten. 42 ezel wen enta dagh simutugan Kel-elyehud y ezel-nasan wa n tesanfawt, awen da fel iga Yusef ed Nikodemos ghaysa dagh tesaskawt ta, felas enta a tehozat.

 

Tanakra en ghaysa dagh temattant

20 As affaw aghôra n ezel wa n alkhad, harwa da wer ifarayray anay, as tosa Maryama ta n Magdala tesaskawt. As din-tosa tenay as tehunt tetiwakkas-du dagh emi en tesaskawt. 2 Tozal tekka Simghon Butros d enalkim wa isannahal ghaysa tara tenn-asan: "emeli itawakkas dagh tesaskawt amaran wer nessen edag wa daq q-egan."

3 Irdagh-du Butros d enalkim wa hadan ekkan tesaskawt. 4 Ozalan fel eshin-essan, tezzar azzar-in enalkim wa hadan felas orna Butros dagh azzal, 5 ishegga inay shisewad shin shifit ensanat den, mishan wer iggez. 6 Simghon Butros wa das-d-ilkaman enta da ewad-du. Iggaz tesaskawt, inay entada shisewad shin ensanat den. 7 Inay asalsaw wa iwaran eghaf en ghaysa wer irtay ed shifit, ittal insa s aganna, iha edag-net. 8 Tezzar iggaz-du enalkim wa hadan, s enta a d-ewadan estizarat, inay arat wa izzegzan-tu. 9 enta harwa da wer egren Iketban n ennebitan win ennanen ghaysa kundaba inkar-du dagh nemmettan. 10 Tezzar eqqalan nalkiman win aghaywan-nasan.

enefilal en ghaysa i Maryama ta n Magdala

11 Maryama tella dat tesaskawt dagh ihez tehallu. Teshegga dagh amazay wa dagh tehallu den, 12 tenay eshin angalosan essimlalnen, eqqiman dagh adag was kala a tu-teha alzanazat en ghaysa. Iyyan illa ghur anamod n aghaf-net, wa hadan illa ghur daran-net. 13 Tezzar ennan-as: "Ma kam isâlan, tantut?" Tenn-asan: "Wer di-iselu ar imiwey wa iga emeli-nin, amaran wer essena dad itawagga." 14 As tenna arat wa, teswad deffer-es, togga ghaysa ibdad. Mishan wer tessen as enta awen. 15 Inn-as ghaysa: "Ma kam-isâlan tantut? Ma imos was tesaggada?" Tenn-as Maryama: "Ya ales wa, kud kay a t-ewayan, temelagh-i dad illa fel a t-id-aweya." Arat wa, as das-tu-tenna a teghil emagyak n afarag wa teha tesaskawt a das-ishewalan. 16 Inn-as ghaysa: "Maryama!", tezzar temalallay-t-in tenn-as dagh awal wa n telghibranit: "Rabbuni!" (almaghna n awen eshikh-in.) 17 Inn-as ghaysa: "A di-wer-tegdela teklay, felas harwa da wer eggezzaya s Abba; kalar aglu emel i medrayan-in as nak ad aggazzaya s Abba-nin, s enta a imosan Abba-nawan kawanay da, aggazzaya s emeli-nin s enta a imosan emeli-nawan kawanay da." 18 Tegla Maryama temal i nalkiman as tenay emeli, temal-asan aratan win fel das-immegrad.

Awa d-izdaran dagh elkettab wa

enefilal en ghaysa i nalkiman-net

19 Tadwit n alkhad wen iman-net, eddewan nalkiman, eghfalan-du ehan fel man-nasan, felas eksudan imuzaran en Kel-elyehud. Osa-ddu ghaysa ibdad gar-essan inn-asan: "Ig-awan Meshina alkher!" 20 Deffer as dasan-inna awen issekn-en ifassan-net, ed tasaga-net. eknan nalkiman tedewit fel anay wa egan y emeli. 21 Ilas inn-asan: "Ig-awan Meshina alkher! ezimazalaq-qawan s asaway was di-d-izammazal Abba." 22 Deffer as dasan-iga batu ta, issewad-du fall-asan s emi-net, inn-asan: "Tegrewamet Infas wa Zeddigan! 23 Win as tessorafam ibakkadan-nasan za, dasan-tewesurefan, amaran win as tan-wer-tessorafam, wer z' egrewan tesureft-nasan."

enefilal en ghaysa i Tuma

24 Tuma was tesemmadeq-net Eknay, wer iha inalkiman win maraw d eshin assagha wa tan-d-osa ghaysa. 25 As ennan nalkiman win i Tuma: "Nenay emeli!", inn-asan: "Wer z-ezzegzenagh iket wer enaya shimijar en nesmar dagh fassan-net, edesagh idaggan-nasan s adad-in, edesa tasaga-net s efus-in."

26 As egan ettam adan deffer awen, eddewan-du nalkiman en ghaysa dagh ahan iyyan amaran ih-en Tuma dagh taklat ten. Iggaz-du fall-asan ghaysa da eharnat tesehar n ahan, ibdad gar-essan, inn-asan: "Ig-awan Meshina alkher!" 27 Deffer adi inn' i Tuma: "Agu adad-nak da, tesweda dagh fassan-in, tedesa tasaga-nin s efus-nak, tezzegzena taqqama da wer teqqelagh ekafer!" 28 Inn-as Tuma: "Ya Meshina di n emeli-nin!" 29 Inn-as ghaysa: "Kay wer tezzegzana har di-tenaya. Iket tefalawist ellan-tu der-es win ser-i ezzegzannen da wer di-enayan!"

elmekhsud n elkettab wa

30 Immozal ghaysa alghalamaten shiyyad aggotnen dat nalkiman-net, mishan ya wer ser-esnat immegrad elkettab wa. 31 Eges arat wa t-ihan, itiwaktab fel ad tezzegzenam as ghaysa enta a imosan elmesikh, imos Barar en Meshina, tessenam entada âs, as ser-es tezzegzanam ad tegrewam temeddurt s esem-net.

Awa d-izdaran dagh elkettab wa

enefilal en ghaysa i nalkiman-net ghur tama n agaraw

21 Deffer awen ilas ghaysa enefilal i nalkiman fel tegadamayt n agaraw wa n Tibereyad. emmek da was inafalal: 2 Simghon Butros, ed Tuma was tesemmadeq-net Eknay, ed Natanayel wa n Kana dagh amadal en Galilaya, ed bararan en Zebeday, d eshin nalkiman wiyyad, ket-nasan eddewan. 3 Inn-asan Simghon Butros: "Nak ad akkagh edag n abbaz en kifitan." ennan-as: "Nakkanay da neddew der-ek." eglan, eggazan taghlalt. Ahad wen wer dagh-as obezan wala.

4 As affaw iwar-in ghaysa tegadamayt n agaraw, mishan wer essenan nalkiman-net as ent' awen. 5 Inn-asan ghaysa: "Imaran-in, ak abbaz a wer tegem wala dagh kifitan?" ennan-as: "Kala". 6 Inn-asan: "egerat emezzezder-nawan wa n abbaz en kifitan fel aganna wa n eghil en teghlalt, a tan-tegrewam." egaran emezzezder-nasan dagh agaraw, tezzar indar-asan a t-id-edkelan, fel awa egan kifitan win t-ehanen dagh iget. 7 Tezzar inkar enalkim wa isannahal ghaysa tara inn' i Butros: "emeli awa!"

Da dagh ad isla Simghon Butros as emeli awen, enta ad iqqan asalsaw-net wa n afalla, felas izzaf, tezzar itaraggat dagh agaraw. 8 Amaæal en sanatat temad n eghil ghas a ellanen gar-essan ed tegadamayt n agaraw. eqqiman-du nalkiman win hadatnen dagh teghlalt erkaban-du deffer-san emezzezder-nasan, idnay kifitan." 9 ezzebben-du ghas oggan temsay en temakaten fel naõõin kifitan, tensa tegella den entada. 10 Inn-asan ghaysa: "Aweyat-du arat dagh kifitan win du-tobazam emeredda." 11 Igmad-du Simghon Butros aman illil-asan s arakab n emezzezder wa ehan kifitan. Temeday ed semmosat temerwen en kifi ed karad es kul win zawwarnen a t-ehanen mishan wer izzerrat. 12 Inn-asan ghaysa: "Ayewat tatshim." Inalkiman wer tan-iha i ihalan ad issesten ghaysa ann-as: "Ma temosa?" felas essanan as emeli awen. 13 Ihoz-tan-in ghaysa, obaz-du tagella ikf-asan-tat, ikf-en entada kifitan. 14 Taklat ta enta a temosat enefilal wa n karad a d-iga ghaysa i nalkiman-net wa n a d-inkar dagh nemmettan.

ghaysa ed Butros

15 Deffer as etshan inna ghaysa i Simghon Butros: "Simghon wa n ag Yakhya, ak tidet da a imos as tara ta di-tege togar ta di-egan nalkiman win hadatnen?" Inn-as Simghon: "Ayew emeli, tessana dagh tara ta dak-ege." Inn-as ghaysa: "Agez ijamaran-in." 16 Ig-as y esestan wa igi wa n eshin inn-as: "Simghon wa n ag Yakhya, ak teregh-i?" Inn-as Butros: "Ayew emeli, tessana dagh tara ta dak-ege." Inn-as ghaysa: "eqqel amadan n ayfed-in." 17 Ig-as y esestan wa igi wa n karad tolas inn-as: "Simghon wa n ag Yakhya, ak teregh-i?" ekhshadan man en Simghon Butros felas karad igitan das-iga ghaysa y esestan wa. Inn-as: "emeli, kay a issanan dagh arat kul, tessanagh as ereq-qay." Inn-as ghaysa: "essen dagh ayfed-in. 18 eggeyyegh esilakanagh-ak as harwa temedreyagh, iman-nak as telassa tabdoq-nak, tetakkagh edag was tare, mishan ezel wa dagh za teqqelagh aghmar, ad tezzelagh ifassan-nak, assals-ik awedan tabdoq-nak, awey-kay s adag as wer taregh iki-net." 19 Batu ta issoka ser-es ghaysa ennugh en temattant ta z-agu Butros s enta as z' assaknu adkul wa ghur-es iga Meshina. Deffer as iga batu ta inna tolas: "elkem-i" 20 Iswad-in Butros deffer-es ogga enalkim wa isannahal ghaysa tara ilkam-asan-du. enalkim wa enta a isaghghamaran dagh ihez n edmaran en ghaysa ahad wad tattin imensewan n emud wa n Akkay. Amaran enta harwa da as kala ad issestanan ghaysa inn-as: "emeli, ma imos wa kay z' akkaddalan." 21 As t-ogga Butros issestan ghaysa inn-as: "enta za emeli, meni taghara-net?" 22 Inn-as ghaysa: "Kud imos as aregh ad idder har d-eqqela da tedi wer kay-teqqel. Kay elkem-i ghas!" 23 Wazawazan salan dagh mezzegzan es ghaysa as enalkim wa wer tu-z-iba. enta ghaysa wergegh a inna wer tu-z-iba, tenna ghas a iga: "Kud imos as aregh ad idder har d-eqqela da tedi wer-kay teqqel."

Zagzal dagh batu ta temosat elmekhsud n elkettab wa

24 enalkim wa enta iman-net as iggeyyat fel igitan win, iktab-tan. Nessan as tegeyya-net tidet a temos. 25 ghaysa iga aratan wiyyad aggotnen. As igmay awedan d a ser-san ammagrad s iyyan-iyyan, ordegh as eddenet kul da wer za tawey elkettaban win z-ikteb dagh talgha ta.