1
ezel iyyan, ishewal Amaghlol i Yunes ag Amittay, inn-as: 2 "enker, akk'aghrem wa zewweran en Ninif, temelagh i messawes esherigha-nin wa tan-in-izayan felas ab'as eqbala tekmawen shin taggin." 3 Den da ad inkar Yunes, mishan ya iddeggag iga anamod n eghrem en Tarshish, y ad inemeggeg d Amaghlol. eddi da ad iras fel eghrem en Yafa, imazayyat-in d eghlal zewweran n aman itakkan Tarshish. Irzam-tu, iggaz-tu, ekkan Tarshish. Den da ad za inemeggeg Yunes d Amaghlol.4
Issegar-d'Amaghlol adu iknan assahat fel agarew, iqqal a olan ed tazafa har ibuk eghlal i tarazay. 5 Teggaz tasa imashaghalan n eghlal, akkiyyan isikaray igammay dagh emeli-net taggazt. A din-eggaran ilalan dagh agarew fel ad ifsas eghlal.As itagg'awen Yunes enta olghat dagh eghlal israd, ikn'etes 6 har t-in-osa emuzar en mashaghalan, inn-as : "kha, ma tekanna da teknêgh etes? enker tegmeya kay da dagh emeli wa-nak taggazt. Mijas enta dagh-nagh issen, igdel-anagh ahluk."
7
Tezzar ad tinemennin mashaghalan n eghlal gar-essan : "Agat-ana shishagheren, ad nessen dagh-na was eddelil-net a fel dana-tegraw tekma ta". egan shishagheren edkalnat-du Yunes. 8 ennan-as : "Dad zama as kay a imosan eddelil en tekma ta, emel-anagh a wa imos esheghel-nak ed sas du-tehe d awa imos akal-nak, d awa temos tamattay ta du-tegmada."9
Inn-asan : "Aw ghibri a emosa. Amaghlol, emeli en jennawan a imosan emeli-nin, enta a d-ikhlakan igerwan ed meælan." 10 Imal-asan degh as edeggeg a iga, y ad inemeggeg d Amaghlol. As dasan-iga'isalan win, tekn-en tasa iguz, tezzar ennan-as : "Mas tetaggagh emazal a?" 11 As enayan tazafa tessas temegirt, ennan-as : "Mas ihor a dak-ku-nagu fel a der-nagh idrer agarew?" 12 Inn-asan : "edkelat-i, egerat-i-in dagh agarew, as iga a di a der-wan idrer, felas essanagh as eddelil-in a fall-awan d-issegaran tazafa ta labasat a."13
Der iga adi da ya, eqqiman gammayan a din sheshiwedan aghlal tama n agarew, eges orn-asan, felas tegla tazafa tekannu fall-asan temegirt. 14 Tezzar ad tattaran s Amaghlol gannin : Ya emeli negmay dagh-ak ad wer nehlek fel eddelil en tamattant n ales a, a dana-wer-tekhkema es tishit en maggan en man. Felas kay a imosan Amaghlol tetamazala es tara-nak." 15 Amaran enkaran mashaghalan n eghlal edkalan Yunes egaran-tu dagh agarew, izzekkat adu, edraran aman n agarew. 16 Tezzar eknan tekseda n Amaghlol, ekatan, eggodayan-as, egan dat-es addawalan.
2
Issoka-d'Amaghlol Yunes kifi iknan tezzewwert ilmaz-tu. Iggaz Yunes tadist-net har iga karad jilan ed karad hadan. 2 Illa den da as iggaz shin esennemel fel Amaghlol, emeli-net, 3 igannu:Tega fall-i tessust, eghregh Amaghlol ikkewan-i
eggazagh ilghi en nemmettan, egmaya taggazt teslegh-i 4 Eder en gerwan dagh-i in-tegara, aman-nasan elmazan-i
żigufufen-nak n aman ed tenazzamaren-nak
tallamnat denneg-i. 5 Har sammadranagh as tawastagha, tawakkasa dat-ek,
Mishan ad elesagh asawad dagh ahan-nak di zeddigan. 6 Agarew ilmaz-i, tegersut as di-ittaf,
aman win ader enerkab a di-egan,
ilattan-nasan eghaf-in der tattalan. 7 Tidekeyye har eres n edghaghan
eghila shisehar n alakhirat har faw as fall-i du-ghaffalnat.
Mishan kay Amaghlol, emeli-nin, anu wer nel'eder a dagh-i du-tekkasa. 8 Iman, as di-eggazan shin agamad, Amaghlol as malallaya.
Tewatray-nin, ehan-nak di zeddigan dagh-as tessesama. 9 Inaghbidan n esseneman,
emmezzayan ed wa imosan emeggi en tenaghen. 10 Mishan nak ad eketa essiggada
temmal tegât dagh godan y ak.
Addawalan win dat-ek ege a tan-assanda,
felas kay Amaghlol a d-effalan efsan!
11
Tezzar omar Amaghlol kifi s a d-afsu Yunes dagh tama n agarew.3
Ilas Amaghlol awal i Yunes, inn-as : 2 "enker akk'aghrem wa zewweran en Ninif, temelagh i messawes emazal wa dak-z-aga ser-san emeredda."3
Ikkewan Yunes y Amaghlol igla ikka Ninif. Ninif iket an aghrem a imos as kundaba karad adan en teklay a fel tu-z-ighres awedan. 4 As din-osa Yunes, iga ezel-net wa azzaran issiwal aghrem, immal y aytedan emazal wa ser-san d-iga, igann-asan : "Da da har ekkozat temerwen n ezel aghrem wa n Ninif ad ighred etewehlak!"5
ezzegzanan Kel-Ninif es Meshina, enamardan s ezum, eghradan telassay en selsa-nasan win tefeyyawt eganen dagh behu, ger win washarnen-nasan wala win madrornen-nasan. 6 As isla emenokal isalan win, inkar dagh tessewt-net ta n taghmar, ikkas takatkat-net ta n temmenukela, ilsa iselsa eganen dagh behu, tezzar iqqim dagh ezed. 7 Tezzar izzerzag emenokal aghrem en Ninif tanat temosat as omaran enta ed meshewwar-net as aytedan d aharay wa endarran, ed wa n shitan kul ad ammazzayan ed tattay ed tassay. 8 Inna: "Aytedan kul ed herwan alsinet iselsa eganen dagh behu, aghrinet Meshina es gelleyat. Awedan kul ammazzayet d ark alkhal wa iga ed tallabest ta itamazal. 9 "Ma issanan! Mijas Meshina a danagh-ihenettet, igmed-t'alham wa labasan a, issuref-ana, naqqam da wer nehlek!"10
Inay Meshina as Kel-Ninif emmezzayan d ark alkhal wa gan, tezzar issoraf-asan eqqiman da wer dasan-iga ahluk wa imal.4
Arat wa igan da ikn-ay Yunes mushekat, iggaz-t'alham. 2 Inna Yunes y Amaghlol : "Ya emeli! Awak masnat a wer ege harwa ehêgh akal-in as arat wa enta iman-net a z'agin? Tekseda n awa da fel egmaya d edeggeg es Tarshish felas essanagh as kay Meshina n emehhennen d emeggi n arrakhmat a temosa, as izzewat alham-net, igget ellugh-net. Faw tesimataga y a din-tewegha fel aytedan ahluk wa dasan-tekhkama. 3 Dagh adi emeredda egmaya dagh-ak Amaghlol a dagh-i tekkesagh iman felas essofa iba temeddurt."4
Inn'Amaghlol i Yunes: " alham da a kay ihan!"5
Deffer awen igmad Yunes aghrem wa n Ninif iddennag-as, iga arat en tafala iqqim dagh telay-net, iqqal y awa za igrewan aghrem.6
Issedwal-du Amaghlol emeli esab iyyan denneg Yunes fel a das-agu telay, y ad t-igmed alham. Esab wa ikna eseddewi en Yunes. 7 Mishan as affaw tufat aghôra issok-ay-du Meshina tawekkay teggaz-tu har tu-tesseghar. 8 As du-teggezzay tefuk issegar-du Meshina ehud iknân tuksay. Tessagh tefuk dagh aghaf en Yunes har ibuk y ekerekki. Igmay tamattant dagh Meshina, inna issof iba temeddurt. 9 Mishan inn-as Meshina : "Awa alham da dagh-ak iga awa igrawan esab a!" Inn-as Yunes : "ege tanat as di-iggaz alham har essofa tamattant!"10
Tezzar inn-as Amaghlol : "Kay teh-ik tehanint n asab a du-wer-tessedwala za wer das-tege wala. Esab a d-idwalan ahad iyyanda, iqqur ahad wa hadan. 11 Manemmek as di-wer-za-teggez tehanint en Ninif temosat aghrem zewweran a dagh teghsâr tekhlek togarat tameday ed sanatat temerwen n egim n awedan wer nefreg zeley n ebrur d ellugh, ehan-tu tolas herwan eknânen iget?"