Mo jabi haala Jawmiraawo fuu, haani o wolwa ko Jawmiraawo umri mo. Haani o yeewta ko seynata Jawmiraawo. Ngam hebtugo muuyo Jawmiraawo dum kaandudum! Ko nelaado Jawmiraawo wadata fuu, haani o tefa anndugo muuyo Jawmiraawo! Jawmiraawo yidi a nana kubaruwol kisndam. A waawataa nuddingo ko a meedaay nango. Hiddeko a jaba haala, sey to a nani ka. Nden a hiima ka, a jaba ka, a nuddina ka! Ngam maajum ko a nanata, haani a wada hakkiilo ngam taa a salo ko hisnete! Ngam kisndam iwi diga nango! Bandiraawo, nango Kongol Jawmiraawo, dum hakkilango yonki ma. Hakkilango haala Allah, dum hakkiilango kisndam ma! Ngam daliila maajum Jawmiraawo wolwani yimbe o wi'i: Onon yimbe, onon ummaatooje duniyaaru, kedite, paame kongol Jawmiraawo. Taa tokke laawol ummaatooje godde. Taa tokke Labbi di ummaatooje cujidanta. Taa dowtane di. Ngam di mbolwataa, di njahataa boo. Taa kule labbi, ngam di mbaawataa wadugo ko halli malla ko woodi! Tokkaago labbi, dum tokkaago majjere, dum tokkaago halkere. Ngam maajum haani an neddo, a hoolo Jawmiraawo, Kanko woni Allah gooto, o geeto, o laamiido duumiido. O kisnoowo, umrooje maako dum umrooje kisndam. O wadi lesdi bee baawde maako, bee faamu maako o tagiri duniyaaru, bee anndal maako o we'itiri asama. Bandiraawo to mi don wolwa ka labbi, waato ka tuurooji, teema a numan, bana dum suuraaji malla payande e kaa'ye e ko lutti tan. Teema a numan ko mi limti do tan ngoni labbi. Aa'a, suuno boo dum lawru! Gidaadi ma an neddo, kanji boo di labbi! Deftere wi'i: «Sey on mbara suunooji luttudi nder moodon, bana daakareeku, e karamdum e wadugo njeenu e dabbugo kuuje kallude, ngam suuno e suujidango labbi, dum gootum!» Kol.3.5, Suuno e sujidanki lawru, dum huunde woore! Tokkando gidaadi mum, foti kal e cujidando lawru. Ngam maajum to mi don wolwa ka labbi, taa a numa ka ledde e kooseeje e ko lutti fuu. Aa'a, suuno boo nandi e sujidanki lawru! To suuno jawdi malla suuno huunde feere hoosi hakkiilo maada fuu, suuno maajum laati lawru ma! Ko a yidi buri Allah fuu, a laatini dum Allah maada. Ammaa Allah didi a dowtano mo feere maako! Diga fuuna haa Hiirna, diga Fombina haa woyla, walaa Allah feere sey kanko tan. Walaa dowanteedo feere nandudo e Allah. Mi yidi a hiima haala ka hakkunde ma e Jawmiraawo. Ngam wakkati waran, a daroto yeeso Jawmiraawo. O yamete ko a wadi fuu, dume a jaaboto mo nyalaade maajum? Bana en ngoni nder duniyaaru jooni, wakkati seyo don. Wakkati suno boo don. Ammaa jooni dum wakkati nanki habaru Jawmiraawo. Dum wakkati nuddingo Jawmiraawo. Dum saa'i dowtanaago mo. Laawol dowtanaago Jawmiraawo don mabbiti. Laawol nuddingo mo don mabbiti. Ammaa suunooji duniyaaru don esta yimbe haa be ngejjita umrooje Jawmiraawo. Di don majjina numooji yimbe! Ammaa taa yejjitu bandiraawo, wakkati bernuki Jawmiraawo don wara! To o berni diga a tuubanaay mo, sey halkere! Ngam maajum haani a wada hakkiilo ngam taa suuno halke! Bana no a yidaa debbo ma hawta bee gorko feere, non boo Allah yidaa a hawta mo e huunde feere! O yidaa a yida huunde feere bura mo. Bernuki maako don wara dow huuwanbe irin maajum. Bernuki maako naa bana bernuki meeden enen yimbe. Ngam to neddo berni, to a hokki mo jawdi, o de"itan. Ammaa Jawmiraawo woodaa haaje jawdi! Walaa ko yaali mo bee jawdi maada. Woodi ko umminta tikkere Jawmiraawo. Dum tokkaago dowanteedo feere. Allah Jawmiraawo o gooto, kanko tagi duniyaaru e asama. Kanko feere maako woni Allah. Walaa ko wi'ete dowanteedo haa duniyaaru, koo asama sey kanko tan. Kanko feere maako woni dowanteedo, mardo teddungal e baawde. Kanko feere maako woni Tagoowo. Ngam daliila maajum annabi Yeremiya wi'i: «Jawmiraawo woni Allah goongaajo.» To a darni huunde feere, a nanditini nde bee Jawmiraawo, a wadi hakkewol mangol! Siftor ko Jawmiraawo wolwani annabi Muusa saa'i o hokki mo umrooje sappo. O wi'i mo: «Min woni Allah Jawmiraawo maada gurtindo ma njeyaangu diga lesdi Misra. Taa jab dowanteebe wobbe sey min feere am.» (Gurt.2O.2-3,) Bandiraawo, Jawmiraawo yidaa a hawta mo, a nannditina mo e tagaadum. To a acci Allah tagoowo a sujidani tagaadum, Jawmiraawo bernan, to wakkati maajum wadi, o hiitete! Ngam maajum «Sey yimbe duniyaaru fuu kula Jawmiraawo, be fuu be ndiwna yeeso maako. Nde o wolwi, duniyaaru laati. Nde o umri, koodume fuu wangi! Barka woodani ummaatoore nde Jawmiraawo woni Allah mum, ummaatoore nde o subi haa o mara nde. Jawmiraawo mo asama don laara, o don yi'a bibbe Aadama.» Jab. 33.8-9,12-13, Bandiraawo, Jawmiraawo don yi'e, o yidi a teddina mo feere maako. A nuddina mo feere maako. Kuuje de ngoni haa duniyaaru fuu, de nyolan, de majjan! Enen yimbe boo en don naywa, en don nyawa, en don maaya. No a mawniri fuu, doole ma a naywan, doole ma a maayan! No a riskiri fuu, risku ma hisnataa ma maayde! Annabo'en maayi, bana Ibrahiima, e Nuuhu, e Suleymaanu, e luttube, be fuu be maayi. Ammaa yonkiiji mabbe njehi to Jawmiraawo, ngam be nuddini mo. Allah Jawmiraawo mo huuwi bee mabbe, kanko woni hande. Kanko wonata jaango. Allah mo yaynini be naange, kanko yayninta en nge hande. Allah Jawmiraawo don duumi haa abada abadin. Allah o mo kenya, mo hande e mo jango. O duumiido haa forti foroy. Haani koomoy fuu hula mo, o nuddina mo feere maako. To wakkati bernuki maako yottake, o hisnan nuddinbe mo bee goonga! Annabi Daawuda faami haala ka'a booddum, ngam daliila maajum o wi'i haa Jabuura: «Onon goonga'en, ceyore Jawmiraawo, laaba berde'en fuu ngimana mo gettooje. Ngam wolde maako goondi, kuude maako fuu de koolniide. O yidi goongaaku e kiita ngoonduka, hinnuye maako heewi duniyaaru fuu. Jawmiraawo tagi asamanji bee umroore mum, naange e lewru e koode fuu bee wolde mum o tagi de. Sey duniyaaru fuu hula Jawmiraawo, yimbe maaru fuu ndiwna yeeso maako.» Jab. 33. Fakat Allah o gooto! Ngam maajum diga hande bandiraawo, haanaay suuno laamane, haanaay ngo laato dowanteedo maada. Ammaa haani a teddina Allah feere mum, a nuddina mo feere maako. Maadalla, Jawmiraawo wallite!